←  Ephesians (5/6)  →

---

1.

Chuongchun, Pathien nau dittakhai in ni leiin a um dan latu ni ro.

2.

Kristan a mi hmangai a, Pathien lawmzawnga rim inhnik thilpek le thilhlan ni dinga ei ta dinga a'n pek ang khan, hmangaina nun nei ve ro.

3.

Pathien mi thienghlimhai khawsak dan dinga mawi lo inngaina suol dam, porchena dam le duamna dam hi nangni lai a samin sam sin naw hrim hrim ro.

4.

Zawlro hril hai, tong mawi naw thaw le fiemthu bawraw hrilhai in ta dingin a mawi nawh; lawmthu hril ching lem ro.

5.

Inngai chinghai, mi tirdakum hai, mi duam, (chuong ang mi lem betu) hai chun Krista le Pathien ramah chan hrim an nei nawh ti hre chieng ro.

6.

Tu khomin thu tep lo mei meiin hlem naw raw hai se cheu; chuong thilhai lei chun Pathien lungsenna chu thu awinawhai chungah a tlung hlak si a.

7.

Chuleiin, anni chu inpawlpui naw ro.

8.

Kha hma khan in inthim a, tu ruok hin chu Lalpaa chun in hung var tah. Chuleiin, var nauhai angin um ro.

9.

Var chu thatna dam, felna dam le thutak tinrengin a ra suok hlak.

10.

Lalpa lawmzawng hriet fie tum lem ro.

11.

Ra nei lo thim thilthawa chun thang ve naw unla, an indik nawzie suklang lem hlak ro.

12.

A ruka an thilthaw hlakhai chu a hril khom inzak a um si a.

13.

Ieng khom varin a sun chu a'n lang chieng hlak; var chu iengkim sukvartu a ni si a.

14.

Chuleiin Pathien Lekha thua khom,"Nang in innghil, har la,Mithi laia inthokin tho rawh,Kristan el var a ti che"ti a ni kha.

15.

Chuongchun, in khawsak danah fimkhur ro, mi invethai anga um loin mi varhai angin um lem ro.

16.

Hun tha naw taka um ei ni leiin in hun hmang tha ro.

17.

Chuleiin, invet taka um loin Lalpa ditzawng chu hriet fie tum lem ro.

18.

Uoiin inrui ching naw ro, chu taka chun zuolkaina a um si a. Chuong nekin, thlaraua sipin um lem ro.

19.

Inpakna hla hai, Pathien hla hai le thlarau tieng hla hai chu inzawt tlangin, lungril taka hla sakin Lalpa chu rimawi rempek ro.

20.

Ei Lalpa Isu Krista hmingin ieng lai khomin iengkimah Pa Pathien kuomah lawmthu hril rop ro.

21.

Krista in inza ang bokin inza tuo ro.

22.

Nuhai, Lalpa thu in awi angin in pasalhai thu khom awi ro.

23.

Krista chu ama taksa kohran sandamtu le kohran lu a ni ang hin, pasal chu nuhmei lu a nih.

24.

Krista kuoma kohran a'n tuklut ang bokin, nuhmeihai khom kong iengkimah an pasalhai kuomah an intuklut ding a nih.

25.

Pahai, Kristan kohran a hmangai ang hin in nuhmeihai hmangai ve ro.

26.

Thu chu tuia hmanga Kohran sawp fai ding le sukthienghlim dingin ama Krista ngei chu a hung inpek a.

27.

Kohran ropui tak, bal kai lo, zur lo le hmel hemna hrim hrim nei lo chu ama ta dinga indin dingin a'n pek a nih.

28.

Chuong ang bokin, pasalhai chun mani taksa an hmangai angin an nuhmeihai khom an hmangai ve ding a nih. Mani nuhmei hmangaitu chun ama a'n hmangai a nih.

29.

Tu khomin mani taksa an theida ngai nawh, Kristan kohran a enkol angin, chawmin an enkol lem hlak;

30.

eini khom a taksa penghai ei ni si a.

31.

Pathien Lekha thua chun, "Chu lei chun pasalin a nu le pa maksan a ta, a nuhmei leh inkop an ta, chuongchun an pahni chun taksa pum khat lo ni tang an tih" ti a ni a.

32.

Hi hi thu inril le inthuk tak a na, kei chun Krista le a kohran thu a hrilna niin ka hriet.

33.

Ieng khom ni sien, nangni lai tu khomin mani a'n hmangai angin a nuhmei khom hmangai raw se; nuhmei khomin a pasal a'n za ding a nih

---

←  Ephesians (5/6)  →