←  Deuteronomy (25/34)  →
1. "Mi an inkhing chun rorelnaah feng an ta, roreltuhaiin lo relpek an ta, mi fel chu thiem inchangtir an ta, mi suol chu thiem naw an inchangtir ding a nih.
2. Mi suolin vuok a phu chun roreltuin inzaltir a ta, a hmaah invuoktir a ta, a suol dan zirin an vuok zat ding bi chu thliek a tih.
3. Amiruokchu voi sawmli neka tam a'n vuoktir ding a ni nawh. Voi sawmli chuong vuok a ni chun, in mithmuah in unaupa chu muolpho a tih.
4. "Bawngchalin bu a chil laiin a hmur khuop naw ro.
5. "Ureng an um khawm a, nau pasal nei loin anni laia mi chu thi ta sien, a thipa nuhmei chu mi dang, puo tieng miin an nei ding a ni nawh. A pasal unauhaiin rochung an ta, nuhmeiah nei an ta, an unaupa thaw ding chu a chunga chun thawng an tih.
6. Nau pasal a neipek hmasa tak chun Israel laia a hming a bo nawna dingin a unau thi tah hming chu a put ding a nih.
7. Sienkhom, ama chun a unaupa nuhmei chu a nei nuom naw chun, a unaupa nuhmei chu kul kotkhar bula upahai kuomah feng a ta, "Ka pasal unaupain Israelhai lai a unaupa hming inumtir zing a nuom naw leiin a unaupa thaw ding chu ka chungah a thaw nuom nawh" a ti ding a nih.
8. A khaw upahai chun ama chu ko an ta, inbiekpui an tih.
9. Ama chun, "Ka nei nuom nawh" tia a thang tlat chun a unaupa nuhmei chun upahai hmaah hang pan a ta, 'A unaupa sungkuo indin nuom nawtu chunga chun hieng anga thaw ni pei raw se' tiin a pheikhok hlippek a ta, a hmaiah chil sakkhum a tih.
10. Chu pa le a thlahai chu 'Sungkuo pheikhok hlippek' ti hming inputtir ning an tih.
11. "Mi insuol hai sien, a pakhat lem nuhmei chun a pasal san suok dingin an suolpuipa sera chun man sien,
12. chu nu kut chu in tanpek ding a nih. In lunginsiet ding a ni nawh.
13. "In mansaah bukna thuhmun ni si, a rik dan inang lo, pakhat a rik lem, pakhat a zang lem in nei ding a ni nawh.
14. Inkhina thuhmun ni si, a lien lem le a chin lem um bok si khom in inah in kol ding a ni nawh.
15. Buklung indik le fel le inkhina indik le fel in nei ding a nih, chuongchun LALPA in Pathienin a pek cheu rama hin dam sawt in tih.
16. LALPA in Pathien chun chuong anga thawtu ni lo, indik lo taka mi dawrtu chu a tirdak a nih.
17. "Aigupta rama inthoka in hung suok laia Amalek mihaiin lampuia an lo thaw dan cheu kha hre zing ro.
18. Sawl le chaua in inzin lai khan lampuiah an lo lambun cheu a, Pathien tina nei hlek loin a hnufuol po an sat hlum a ni kha.
19. Chuongchun, LALPA in Pathienin hluo ding le rochung ding ram a peka in doralhai laka muongna a pek pha cheu chun, Amalekhai hi vankhup hnuoia tu hriet hlaw ta lo dingin sukchimit ro. Chu chu theinghil der naw ro!
←  Deuteronomy (25/34)  →