←  Daniel (5/12)  →
1. Lal Belsazar chun a mi ropui sangkhat ruol ta dingin ruoi ropui tak a the a, uoiin an dawn tlang a.
2. Belsazarin uoiin a dawn lai chun a nuhmei hai, a hmei hai le a mi lien hai uoiin dawnna dingin a pa Nebukadnezzarin Jerusalem Tempula inthoka tangkaruo le rangkachak no a hung lakhai laia mi chu hung la suok dingin thu a pek a.
3. Chuongchun, Jerusalem Tempula inthoka an lak rangkachak no mawihai chu an hung chawi a, lal le a nuhmei hai le hmei hai le a milien hai chun zu dawnnain an hmang a.
4. Chuonga zu an dawn lai chun rangkachak dam, tangkaruo dam, thir dam, dar dam, lung dam le thing dama siem an milem pathienhai chu an chawimawi a.
5. Chuong lai tak chun mihriem kutpar a hung inlang a, lal ina khawnvar siena bula bang zut nama chun thu a hung ziek a, a ziek lai chu lal chun a thlir zing a.
6. A hmai chu a hung dang a, a ti em leiin a khup le khup invaw tuo hlop hlop khopin a'n thin a, a ke tha a zoi thla vong a.
7. Lal chun a aikei thiem hai, arasi hmanga aisan thiem hai le dawithiem hai chu a'n kotir a, chuong Babulon mi varhai kuoma chun, "Tu khom hi thu ziek hi tiema a hrilfiena mi hril theitu chu puon senduk insiltir ning a ta, rangkachak thi inhlitir ni bok a ta, a rama roreltu lien tak pathumnaah sie ning a tih" a ta.
8. Chuongchun, lal mi varhai po po chu an hung lut a, sienkhom ziek chu an tiem thei naw a, an hril fie thei bok nawh.
9. Lal Belsazar chu a thlabar zuol a, a hmai khom a hung dang zuol a, a milienhai hlak chun thaw ngaina an hriet bok si nawh.
10. Lal le a milienhai ri chu hrein lalnu chu ruoithena pindana chun a hung lut a, "Aw laltak, kumkhuoin dam rawh. Thlabar naw rawh. I hmai khom dang naw raw se.
11. I lalrama hin pathien thienghlimhai thlarau nei mi pakhat a um a. I pa, laltak hun lai khom khan chu mi chun pathienhai tluka thu inril hriet theina le varna a kol ti hriet suok a ni ta a; i pa, lal Nebukadnezzar ngeiin dawivai thiem hai, aikei thiem hai, arasi hmanga aisan thiem hai le dawi thiem hai hotu takah a siem a.
12. Ama Daniel, i pain Beltesazar tia a ko chu mi lungril hrat, hrietna hau le hriet thiemna nei mi, manghai hrilfie thiem, thu khirkhan hrilfie thei mi le harsatna hrang hrang sut kieng theitu a nih. Daniel chu inkotir la, thuziek umzie chu hril fie thei a ti che" a ta.
13. Chuongchun, Daniel chu lal hmaa chun an hung thuoi a. Lal chun, "Nang Daniel, ka pa laltakin Judai rama inthoka saltang a hung thuoi laia mi chu i ni maw?
14. Nangmaah pathienhai thlarau a um thu le sungril mit varna nei, lungril hrat tak le var chungchuong i ni thu ka lo hriet a.
15. Hi thu ziek hi tiema a umzie mi hrilfie dingin mi varhai le aikei thiemhai an hung thuoi a, sienkhom tu khomin a umzie an mi hril thei naw a.
16. Nang ruok chun thil harsahai khom hril fiein i sukfel thei ti ka lo hriet a. Hi thil ziekhai hi tiema i mi hril fie thei chun puon senduk insiltir ning i ta, rangkachak thi inhlitir ni bok i ta, ka lalrama roreltu lu tak pathumnaah sie ni bok i tih" a ta.
17. Daniel chun lal kuomah, "I thilpekhai chu nangma ta ni sien, i lawmmanhai chu mi dangin chang raw hai se. Sienkhom thil ziek chu lal hriet dingin tiem ka ta, a umzie hril fie bok ka tih.
18. Aw laltak, Chunghnungtak Pathien chun i pa Nebukadnezzar kuomah chunghnungna hai, inlalna hai, ropuina hai, chawimawina hai le mawina hai a pek a.
19. Ngirhmun insang tak a pek lei chun mi tina mi le hnam tina mi le tong tina mihai chun an ti a, a hmaa chun an inthin hlak a. Lal chun sukhlum dinga a tihai chu a sukhlum a, dama a hla nuomhai chu a hla a, a chawisang nuomhai a chawisang a, a suktlawm nuomhai chu a suktlawm a.
20. Sienkhom a hung chapo a, uongthuongnain a lungril a sukngar phing leh a lalthungphaa inthokin a pei thlak a, a ropuina po po chu a lakpek vong a.
21. Chun, mihriemhai laia inthoka hnot suokin, ramsa lungril a'n puttir a, ram sabengtunghai lai a khawsa a, ran angin hlo a pet a, van daidawin a tlak khum a, Chunghnungtak Pathien chu mihriemhai lalram chunga thuneitu tak le a ditsak taphothai chunga lalna petu a nizie a hriet suok le pom hma chun chuong ang chun a khawsa a nih.
22. "Sienkhom a naupa nang Belsazar chun hieng po po hi i hrieta chu inngaitlawm i tum nawh.
23. Inphahnuoi nek hmanin vana LALPA i cho a, a tempula nohai chu i kuomah i hung inlaktir a, i nuhmeihai le hmeihai le i milienhaiin zu dawnnain in hmang a. Rangkachak dam, tangkaruo dam, dar dam, thir dam, thing le lung dama siem i milem pathienhai, ieng khom hmu thei lo, ngaithla thei lo le hre thei lohai chu i chawimawi a, i hringna le i lampui po po a kuta koltu che Pathien ruok chu inza nachang i hriet nawh.
24. Chuleiin ama chun hi thu ziek ding hin kut a hung tir a nih.
25. "Hi hi a nih a ziek chu: MENE, MENE, TEKEL, PARSINc.
26. A hrilfiena chu hi hi a nih: MENE: Pathienin i lal hun sung dinga a ruot chu a tawp tah.
27. TEKEL: Bukin i um a, i tling ta nawh.
28. PARSIN: I lalram chu thein a um a, Media le Persia kuomah pek a ni tah" a ta.
29. Chun, Belsazar thupekin Daniel chu puon senduk an insiltir a, rangkachak thi an inhlitir a, a lalrama roreltu lu tak pathumnaah a puong a.
30. Chu zan la la chun Babulon mi Belsazar chu that a ni a,
31. Media mi Daria, kum sawmruk le pahnia upa chun ram chu a chang tah a nih.
←  Daniel (5/12)  →