←  Colossians (4/4)    
1. Hotuhai, nangni khom vanah Hotu in nei ti hrein in bawihai chungah indik tak le tha takin iengkim thaw hlak ro.
2. Tongtai fan fan unla, inveng zing unla, lawmthu hril rop ro.
3. Kol ka bunna san, Krista thuruk kan tlang insampuinaah Pathienin a thu kan hrilna ding kot a mi hongpek theina dingin mi tongtaipek bok ro.
4. Ka hril tum ang tak ka hril theina dingin mi tongtaipek bok ro.
5. Ringnawtuhai lakah var takin um unla, anni lakah in hun a hlawk thei ang takin hmang ro.
6. Ieng lai khomin tlai tak le hawihawm taka tong ching unla, chuongchun mi tin an mamaw ang peia don dan thiem thei in tih.
7. Lalpaa ka siehlaw chanpui, rongbawltu ringum tak le ka unau dit tak Tukik hin ka chanchin po po hril a ti cheu.
8. Kan chanchin in hriet a, lungril hlim taka in um theina dingin ka hung tir a nih.
9. Ama ruol hin nangni mi, unau dit tak Onesima, ringtu nghet tak hi ka hung tir ve a, hieng tieng chanchin hi hung hril vong an ti cheu.
10. Ka'n tangpui Aristarka hin chibai a buk cheu. Barnaba tupa Marka khomin chibai a buk cheu. Ama hi in kuoma a hung pha lo lawm lut dingin ka hril ta cheu kha.
11. Isu, Justa an ti hin chibai a buk cheu. Juda Kristienhai lai chu anni chauh hi Pathien ram ta dinga mi thawpuitu an ni a, an mi thlamuong hle a nih.
12. Epafra, nangni mi, Krista Isu siehlaw hin chibai a buk cheu. Nghet taka in ngir a, in hung puitling a, Pathien ditzawng anga ringtu indik tak in ni theina dingin thahnemngai takin a tongtaipek hlak cheu a nih.
13. Nangni rawi ta ding dam, Laodikei khuoa mihai le Hairopolis khuoa mihai ta ding damin ama hi a thok nasa em em ti ka hriet bok
14. Luka, daktor dit tak le Dema hin chibai an buk cheu.
15. Laodikei khuoa unau umhai le Numfa le a ina kohran inkhawmhai kha chibai mi hung buk ro.
16. Ka lekha hi nangni lai in tiem zo pha Laodikei kohran khom intiemtir ve ro, chuong ang bokin Laodikei kohran lekha hi lo tiem ve ro.
17. Chun, Arkhipa kuoma khan, "Rongbawl sin Lalpa kuoma inthoka i dong kha hlen dingin thang la rawh" ti hi mi hung hrilpek ro.
18. Kei Paula hin keima kut ngeia chibai ka hung bukna cheu a ni hi. Ka kol bun hi hung theinghil ngai naw ro. Lunginsietna in kuomah um raw se.
←  Colossians (4/4)