←  2Thessalonians (2/3)  →
1. Unauhai, ei Lalpa Isu Krista hung nawkna ding le a kuoma ei intuokkhawmna ding thua chun,
2. keinin thlaraua kan hril ni awm tak anga an hril sawng le kan lekhathona kan ziek ni awm taka an hrilhai thangsana, "Lalpa ni chu a hung tlung zing tah" ti thu an hril thang hin in lungril sukchang lo le sukthlaphang lo dingin ka ngen cheu.
3. Tu khomin ieng konga khom thuoi hmang naw raw se cheu. Sukbohmanga um ding Danbawsepa chu hung a, helna a siem hma khat chun chu Ni chu hung tlung naw nih.
4. Ama chun, 'pathien' tia an ko le biek taphothai chu doin an chungah um tum a ta, Pathien tempula meuh thungin Pathienah insal a tih.
5. In kuoma ka um lai khan hieng thil hi ka hril tah hlak cheu kha in hriet zing am?
6. A hun takah a hung inlang theina dingin tu hin iengin am a dang hri ti in hriet.
7. Danbawsepa chun tu khom hin a rukin sin a thaw zing a, sienkhom a dangtu chu lak hmang a ni hma khat chun la dang hri'ng a tih.
8. A hung inlang pha leh Lalpa Isu chun a thuokin mut hlum a ta, a hung nawkna ropui taka chun sukbohmang a tih.
9. Danbawsepa chu Setan hratna leh hung a ta, a thilthawtheina tinrengin thilmak le inchikna tehlem thawng a tih.
10. Bohmang dinghai chu suolna tinrenga hlemin um an ta, sandama an um theina ding thutak chu dit loa an hnawl leiin bohmang an tih.
11. Hieng lei hin, khel an ring theina dingin Pathienin ngai suolna hri nasa takin a'n lengtir a nih.
12. Thutak ring loa ritlona lawm lemtuhai po po chun thiem naw an chang vong ding a nih.
13. Unau, Lalpa dittakhai, a tira inthoka Pathienin Thlaraua sukthienghlim a, thutak ring ding le ra hmasa ni dinga a thlang cheu leiin Pathien kuomah lawmthu hril rop ding kan ni hrim a nih.
14. Chu chu ni ding le ei Lalpa Isu Krista ropuina chu chang dingin kan Chanchin Tha hril hmangin a ko cheu a ni kha.
15. Chuongchun, unauhai, ngir nghet unla, kan thuhril le lekhathona zirtirna kan inhlan sawng po po cheu kha pom tlat ro.
16. Chuongchun, ei Lalpa Isu Krista ngei le Pathien ei Pa, mi hmangaitu, a lunginsietna leia kumkhuo thlamuongna le beiseina ei phu naw saa mi petu chun,
17. thil tha tinreng in thawna le hrilna taphotah chokphurin sukhrat pei cheu raw se.
←  2Thessalonians (2/3)  →