←  2Samuel (4/24)  →
1. Saula naupa Isboset chun Hebrona Abner thi thu a lo hrietin a lungril a zam em em a, Israel mihai po po khom an thlaphang a.
2. Chun, Saula naupa chun mi runtu pawla hotu pahni a nei a, an hming chu Baana le Rekab an nih. Anni chu Benjamin thla Beerot mi Rimon naupahai an nih (Beerot chu Benjamin rama ngai a nih.
3. Beerot mihai chu Gitaim-ah an tlan a, tu chen hin chu taka chun an la um zing.)
4. Chun, Saula naupa Jonathan chun naupa kebai a nei a. Jezreel-a inthoka Saula le Jonathan thi thu an lo hriet chun kum nga mi chauh a la ni a, a enkoltu chun a pom a, a tlanpui a, a'n hmaw taluona lamah a'n thlak pal a, a ke a hung inbai pha ta a. A hming chu Mefiboset a nih.
5. Chun, Beerot mi Rimon naupa Rekab le Baana hai chu Isboset in panin an fe a, ni sat vanglai tak, a sun chawl lai chun a in chu an tlung a.
6. Bu la ding ni awm takin in sung ril tieng an lut a, a phingah an sun a, Rekab le a unaupa Baana chu an inrel hmang ta a.
7. A khuma a lo zal lai chun a nih inah an lut chu. An sun hlum hnung chun a lu chu an lak a, an chawi a, Araba pal tlangin zankhuoin an fe a.
8. Hebrona chun Isboset lu chu Davida kuomah an hung chawi a, a kuomah, "Hi i hmelma, i hringna la tumtu, Saula naupa Isboset lu chu a nih. LALPA chun ka lalpa phuba chu voisun hin Saula le a thlahai lakah a lakpek tah a nih" an ta.
9. Davida chun Berot mi Rimon naupa Rekab le a unaupa Baana kuoma chun, "Ka mangangna po poa mi sansuoktu LALPA hringna salin ka hril,
10. chanchin tha hung hawna inngaiin, 'Ngai ta, Saula chu a thi tah' tiin mi pakhatin a mi hung hril a, ama chu ka man a, Ziklag-ah ka that a; chu chu a chanchin tha hung intlun mana ka pek a nih.
11. Mi fel, ama in sung luma um, a khum laizawl ngeia mi suolin an that thisen man chu in lakah phut nawkzuolin, hi hnuoia inthok hin ka va hang sukbo chieng ding cheu de aw!" a ta.
12. Chuongchun, Davida chun a tlangvalhai chu thu a pek a, anni chu an that a, an kut le ke an tanpek a, Hebrona dil kama chun an khai a. Isboset lu ruok chu an lak a, Hebron-a Abner thlana chun an phum a.
←  2Samuel (4/24)  →