←  2Samuel (12/24)  →
1. LALPA chun Davida kuomah Nathan a tir a. A hung chun a kuomah, "Khaw pakhata hin mi pahni an um a, pakhat chu mi hausa a na, pakhat chu mi rethei a nih.
2. Mi hausa chun beram ruol le bawng ruol a hau em em a.
3. Mi rethei ruok chun beram la chikte an chawk chauh chu a nei a, a vai a, a nauhai leh a chawm tlei a, a fak le dawn ang ang chu an intawm a, a angsungah a pom in a, a naunu ang hielin a cheibawl a.
4. Chun, mi hausa chun mikhuol a nei a, a beram ruol le bawng ruol laia mi chu thata thlaithleng siempek nekin mi rethei beram la tuoi chu a lakpek a, a ina mikhuol hme ding chun a thatpek a" a ta.
5. Chu mipa chunga chun Davida chu nasa takin a lung a sen a, Nathan kuomah, "LALPA hringna salin ka hril hi, chu thil thawtu chu thi tlak a nih.
6. Hieng ang thil a thaw lei le lunginsietna a nei naw leiin a beram tuoi chu a let liin a rul ding a nih" a ta.
7. Nathan chun Davida kuomah, "Chu pa chu nang hi i nih. LALPA, Israelhai Pathien chun hieng hin a hril: 'Israelhai lal dingin hriek ka nal che a, Saula kuta inthokin ka san suok che a.
8. I pu in le lohai ka pek che a, a nuhmeihai chu i angsungah ka sie a. Israel sunghai le Juda sunghai khom ka pek che a. Chuonghai chu a tlawm taluo i ti a ni chun a dang khom ka pek belsa ding che annawm.
9. Ieng dinga LALPA thu chu ngainep a, a mithmuah thil tha lo i thaw am a na? Hit mi Uria chu kawlhnamin i sukhlum a, a nuhmei i neipek a. Amon mihai kawlhnamin i that a nih.
10. I mi ngainep a, Uria nuhmei chu i nuhmei dinga Uria i lakpek leiin tuta inthok hin i inah kawlhnam inleng tang a tih' tiin.
11. "Hi hi LALPA thu chu a nih: 'Nangma sungkuoa inthok ngeiin i chungah sietna hung intlungtir ka tih. I mithmua ngei i nuhmeihai chu lakpek ka ti che a, i tuolbawm kuomah peng ka ta, i mithmua ngei sun pachangah i nuhmeihai chu zalpui a tih.
12. Nang chun a rukin i thaw a, kei ruok chun Israelhai po po mithmua ngei sun varah ka thaw ding a nih" a ta.
13. Davida chun Nathan kuomah, "LALPA lakah thil suol ka thaw a nih" a ta. Nathan chun, "LALPAN i suolna a lak hmang ta a, thi naw ti nih.
14. Amiruokchu, hi thil i thaw hin Pathien hrilsietna remchang tak LALPA hmelmahai ta dingin i siempek leiin, i laka pieng naupang chu thi ngei ngei a tih" a ta. Nathan chun a in tieng a fesan ta a.
15. In tieng Nathan a'n lawi hnung chun Uria nuhmeiin Davida a hringpek naupa chunga chun LALPAN kut a thlak a, a hung dam naw a.
16. Naupang ta dingin Davida chun a ngenpek a. Bu a nghei a, a inah a lut a, zankhuoin tuongah a zal a.
17. A sungkuoa upahai chun kei tho tumin an ngir huol a, sienkhom a tho nuom naw a, an kuomah bu khom a fak bok nawh.
18. A ni sarinaa chun naupang chu a thi a, Davida siehlawhai chun naupang thi thu Davida kuoma hril an rin a, "Ngai ta u, naupang dam lai hman khan a kuomah thu ei hril a, a ngaithlak nuom naw a, tuhin naupang thi thu chu iengtin am ei hril ngam ta ding a na? Ama le ama iengtin amanih in thaw el a tih" an ta.
19. A siehlawhai inbiekruk vel dana inthokin Davida chun naupang chu a thi tah ti a hriet a, "Naupang chu a thi ta maw?" a ta, anni chun "A thi tah" an ta.
20. Chu phing leh Davida chu tuonga inthokin a tho a, a'n sil a, hriek a'n nal a, a silfen a thlak a, LALPA inah a fe a, Pathien chibai a buk a, a in tieng a kir nawk a, fak ding a lam a, an hung thur a, a fak a.
21. A siehlawhai chun a kuomah, "I thilthaw dan hi iengtizie am a na? Naupang damnaw lai khan bu i nghei a, i tap a, sienkhom naupang a thi a, i tho a, bu dam i fak ta lem tlat si a!" an ta.
22. Ama chun, "Naupang damnaw lai khan bu ngheiin ka tap hrim kha. Ka lungrilin, 'LALPAN mi lunginsiet a ta, naupang chu a hung dam nawk el rawi mawh' ka ti lei a nih.
23. Tu ruok hin chu a thi ta a, ieng leiin am bu ka nghei ta ding? Ka ko kir thei nawk ding am a ni? A kuomah kei chu la feng ka ta, ama chu ka kuom tieng hung kir ta naw nih" a ta.
24. Chun, Davida chun a nuhmei Bathsheba chu a thlamuon a, a kuomah a lut a, a zalpui a, naupa a hring a, a hmingah Solomon a sak a, ama chu LALPAN a hmangai a.
25. LALPAN a hmangai leiin zawlnei Nathan kuomah a hminga Jedadia sakh dingin thu a pek a.
26. Chuong lai chun Joab-in Amon thlahai khawpui Raba a run a, lal kul chu a lak a.
27. Joab chun Davida kuomah mi a tir a, "Raba ka run a, an tui lakna hmun ka lak ta a.
28. Tu hin sipai dang po po hung khawm la, a khawpui hung inhuol inla, hung la rawh. Chuong naw chun keiin lang ka ta, hming that hlaw hlau rawi ka tih" a ta.
29. Davida chun a mihai po po chu a khawm a, a'n inthok suok a, an va run a, an lak ta a.
30. Amon thlahai milem biek Milkom an inkhumtir rangkachak lallukhum chu an lak a, chu taka chun lunghlu khom a thang sa a, a rikzie chu kilogram sawmthum pali lai a nih. Chu chu Davida an inkhumtir a, khawpuia inthok chun rallak sum tam tak an lak bok a.
31. A khaw mipuihai chu an man a, thing attu dam, hnuoi inlettu dam, thing phurtu dam le teklei siemtu damin a sor a. Chuong ang chun Amon thlahai khuo po poa chun Davidan a thaw a, a sipaihai po po leh Jerusalem tieng a kir nawk ta a.
←  2Samuel (12/24)  →