2John (1/1)

---

1.

Upa chun, Nuhmei inzaum, Pathien thlang le a nauhai, thutaka ka hmangaihai, keima chauh khom ni loin thutak hretu dang po po khoma an hmangaihai chu chibai ka buk cheu;

2.

chu thutak, einia cheng chu kumkhuoin ei kuomah um a tih.

3.

Chu thutak le hmangainaa chun Pa Pathien le a Naupa Isu Krista kuoma inthoka lunginsietna dam, zangaina dam le inremna dam in kuomah um raw se.

4.

Pain thu a mi pek anga i nauhai thenkhatin thutaka kal an chawi ti ka hmu leiin ka lawm takzet a nih.

5.

Nuhmei inzaum, thupek thar ni loin a tira inthoka ei dong kha hril ding chein ka ziek a nih; inhmangai tuo dingin ka ngen cheu a nih.

6.

A thupek ang peia ei um hi hmangaina chu a nih; hi hi a thupek, a tira inthoka in hriet kha a nih, 'hmangainaah in um zing ding a nih' ti hi.

7.

Hlemtu tam tak, Isu Krista chu taksa putin a hung ti pom nawtuhai chu khawvelah an hung suok tah a, chuonghai chu hlemtu le Krista dodaltuhai an nih.

8.

In inrimnahai thlawn loa in thaw ra kim taka in hmu theina dingin, mani inveng tha ro.

9.

Tu khom Krista zirtirna anga khawsa loa a zirtirna khela khawsatu chun Pathien a nei nawh. A zirtirna thua um zingtu chun P� le Naupa a nei kop a nih.

10.

Chu zirtirna fepui lo, in kuoma hung tu khom in inah intlungtir naw unla, tongbau tha khomin inthla naw ro.

11.

Tongbau thaa betu chu a thil suol thawa chun a thang ve a nih.

12.

In kuomah thu tam tak hril ding nei lang khom lekha le lekhatuia ziek ka tum nawh; ei lawm a kim tlang theina dingin in kuomah hung a, inhmatona inbiek ka beisei lem a nih.

13.

Thlang laia mi ni ve, i zuorpui nauhaiin chibai an buk che.

---

2John (1/1)