←  1Samuel (28/31)  →
1. Chuong lai chun Filistinhai chun Israelhai do dingin an sipaihai an khawm a. Akis chun Davida kuomah, "Nang le i mihai hi ka kuomah in hung ve ngei ding a nih ti hre ro" a ta.
2. Davida chun, "Ni e, chu pha chun nang ngeiin i siehlaw hin iem a thaw thei ti hrieng i tih" a ta. Akis chun, "A tha chu, mi vengtuah sie kumkhuong ka ti che" a ta.
3. Samuel chu a thi ta a, Israel mi po poin an sun a, ama khuo Rama-ah an vui a. Saula chun rau inzawlpui neihai le aienthiemhai chu a rama inthokin a hnot suok vong ta a.
4. Filistin mihai chu an pung khawm a, Sunema chun an hung a, an inkul a, Saula chun Israelhai po po chu a khawm a Gilboa chun an inkul ve a.
5. Saulan Filistin sipaihai a hmu chun a ti hle a, a lungril chu thlabarnain a sip a.
6. Saula chun LALPA a rawn a, sienkhom mang amani, Urim amani le zawlnei amani hmangin donna hrim hrim a hmu nawh.
7. Chuongchun a siehlawhai kuomah, "A kuomah fea ka rawn ding aienthiem nuhmei mi zongpek ro" a ta. A siehlawhai chun, "Endor khuoah nuhmei aienthiem a um" an ta.
8. Chuongchun, Saula chu silfen dang inbelin a'n siem danglam a, mi dang pahnih thuoiin nuhmei kuoma chun a fe a, "A hming ka hril taphot rau chu mi kopek rawh" a ta.
9. Sienkhom nuhmei chun, "Ngai ta, Saula thilthaw i hriet a, a rama inthokin aienthiem le dawithiemhai a sukbo vong ta a. Ka thina dingin ieng dinga chang i kam am a na?" a ta.
10. Saula chun LALPA hming salin, "LALPA hringna salin ka hril, hi thil lei hin i chungah hremna tlung naw nih" a ta, a kuomah inkhamin thu a tiem a.
11. Chu phing leh nuhmei chun, "Tu am kopek lang che i nuom a?" a ta, ama chun "Samuel mi ko pek rawh" a ta.
12. Nuhmeiin Samuel a hmu chun a khek rak a, Saula kuoma chun, "Ieng dinga i mi hlem? Saula i ni zing si a" a ta.
13. Lal chun a kuomah, "Ti der naw rawh. Iem i hmu a?" a ta. Nuhmei chun, "Hnuoia inthoka thlarau hung suok ka hmuh" a ta.
14. Saula chun, "Ieng ang hmel am a put a?" a ta, nuhmei chun, "Putar tak hi a hung suok a, korfuol a hak" a ta. Saula chun Samuel a nih ti a hriet nghal a, hmaia hnuoi sikin chibai a buk a.
15. Samuel chun Saula kuomah, "Ieng leia hienga ko suoka i mi sukbuoi am a na?" a ta. Saula chun, "Ka bei a dong ema a nih. Filistinhaiin an mi hung do a, Pathien hlakin a mi nghatsan ta bok si a. Zawlnei amanih mang amanih hmang khoma a mi don ta naw hrim hrim. Chuleiin, ka thaw ding indon ding chein ka ko el che a nih" a ta.
16. Samuel chun, "Chuonga LALPAN a nghatsan ta che a, i hmelma a lo ni tah ti hre zing siin ieng leia thu i min don am a na?
17. Keima hmanga a hril che ang khan LALPA chun i chungah a thaw a ni ta chu. LALPA chun i kuta inthokin ram chu a lakpek ta che a, i tuolbawm Davida ngei chu a pek tah a nih.
18. LALPA thu i awi naw a, Amalek mihai chunga nasa taka a lungsenna chu i hlenpek naw leiin tu hin i chungah hieng hin a thaw an ta hi.
19. Chu naw khom chu, LALPAN nangma le Israelhai po po chu Filistinhai kutah peng a ta, zinga hin nang le i naupa leh ka kuomah hung um tang in tih. LALPA chun Israel sipai khom Filistinhai kutah peng a tih" a ta.
20. Samuel thu hril lei chun Saula chu a ti ta em em a, hnuoiah a tlu let der a, sunnithlak le zankhawvara bu fa ta lo a ni bok a, tha le zung hrim a nei nawh.
21. Nuhmei chu Saula kuomah a hung a, nasa taka lungngaiin a hmu a, a kuomah, "Ngai ta, i siehlawnu hin i thu ka awi a, ka hringna chan huomin thaw dinga i mi hril chu ka thaw a.
22. Lunginsiet takin i siehlawnu thu hi awi ve thung la, bu tlawmte bek siempek ka ti che a, i fe phaa thahrui i nei theina dingin fa hram rawh" a ta.
23. Sienkhom a nuom naw a, "Fa naw ning" a ti tlat a. A mi thuoihai le nuhmei chun an ngen tlat leiin an thu chu a awi ta a. Chuongchun, hnuoia inthok chun a hung tho a, khuma chun a'n thung a.
24. Nuhmei chun bawng tuoi thau tak a nei a, inrang takin a va that a, beiphit a lak a, a hmet a, chol thang lo bei a siem a,
25. Saula le a siehlawhai hmaa chun a sie a, an fak ta a. Chuongchun an tho a, chu zan chun an fe ta a.
←  1Samuel (28/31)  →