←  1Samuel (27/31)  →

---

1.

Davida chun a lungrilin, "Ieng ni amani chu Saula kuta hin ka la thi ngei awm hi. Ka ta dinga thaw ding tha tak chu Filistinhai rama tlan lut a nih. Chu chun, Israel ram po poa Saulan a mi zong hi tawpsan a ta, a kuta inthokin suok thei ka tih" tiin a'n ngaituo a.

2.

Chuongchun, a mi zaruk thuoiin Davida chu Maok naupa Akis, Gath lal kuoma chun a fe a.

3.

Davida le a mihai chu Gath-a chun Akis kuomah an khawsa a. Mi tinin an sungkuohai an thuoi a, Davida khomin a nuhmeihai pahni, Jezrel-a mi Ahinoam le Karmela mi Abigail, Nabal nuhmei thisan chu a thuoi a.

4.

Gath khuoah Davida a tlan ti Saulan a hriet chun a zong nawk ta naw a.

5.

Davida chun Akis kuomah, "I mit ka tlung a ni chun, i rama khaw pakhata hin ka umna ding mi ruotpek la, chu taka chun um kan tih. I siehlaw hi ieng dingin am lal khuoah i kuomah a um zing ding a na?" a ta.

6.

Lal Akis chun chu ni la la chun Ziklag khuo a pek a, chuleiin voisun chen hin Ziklag chu Judai ram lalhai ta a la ni ta zing a nih.

7.

Davida chu Filistinhai rama chun kum khat le thla li a um a.

8.

Chun, Davida le a mihai chun Gesur mi hai, Girzi mi hai le Amalek mi hai chu an hang run a; chuong hnamhai chu Sur panna lampuia Telam chen le Aigupta ram chena inzar an nih.

9.

Davidan a runna hmuna hrim hrim chun a nuhmei a pasalin tu khom a dama hla a nei naw a, an beram le bawnghai, an sabengtung le sanghawngseihai le an silfenhai ruok chu a lak a, Akis kuomah a kir nawk hlak a.

10.

Akis chun, "Voisun khaw tieng am i run a?" a ta. Davida chun, "Sim tienga um Judai ram dam, Jerahmeel-hai ram dam le Ken mihai ram dam" a ta.

11.

"Hieng ang hin Davida chun a thaw hlak hrim a nih" titu ding an um pal nawna ding tiin Davida chun tu khom dama hla a nei naw hlak hrim a nih. Filistinhai rama a um sung po po chun chuong ang chu a thaw dan a nih.

12.

Akis chun Davida hril chu awiin, "A mihai theida a phur nasa ta em leiin kumkhuoin ka siehlawah a um ding a ni hi" a ti lungril a.

---

←  1Samuel (27/31)  →