←  1Samuel (19/31)  →
1. Saula chun a naupa Jonathan le a siehlawhai po po chu Davida that dingin a hril a.
2. Jonathan ruok chun Davida chu a ngaina em leiin a kuomah, "Ka pa Saula hin sukhlum dan che remchang a zong leiin zinga inthok chu fimkhur la, inbi hmang la, chu taka chun um zing rawh.
3. Fe suok ka ta, i umna phulah ka pa ngirpuiin inbiekpui ka ta, ka thil hriet chu hung hril nawk ka ti che" a ta.
4. Jonathan chun a pa Saula hmaah Davida chu inpakin, "Lal chun a siehlaw Davida chungah poi tawk lul naw raw se, i poi ieng khom a tawk naw a, i ta dinga thil tha tak vong a nih a thaw lem hlak chu.
5. Thi huomin Filistinpa a bei a, LALPAN Israelhai po po ta dingin ropui takin a'n hnetir a, chu chu nang khomin i hmu a, i lawm hle kha. Chuleiin, poi tawk lo chungah ieng leiin am thil suol thawin, a san um loin Davida chu i that ding a na?" a ta.
6. Saula chun Jonathan thu hril chu a pom a, "LALPA hringna salin ka hril, Davida chu sukhlum ni naw top a tih" tiin thu a'n kham a.
7. Jonathan chun Davida chu a ko a, chuong thil po po chu a hril a. Jonathan chun Davida chu Saula kuomah a thuoi a, a hma ang bokin a kuomah a um nawk ta a.
8. Indo a hung um nawk a, Davida chu a'n thok suok a, Filistin mihai chu nasa takin a va bei a, a that teu a, a hmaa chun an tlansie dur dur a.
9. Chun, Saula chu a ina fei chawia a'n thung laiin LALPA tirh ramhuoiin a hung soisak a.
10. Davidan tingtang a tumpek lai chun Saulan bang le thil khop tumin a fei chun a khaw a, sienkhom Davida chu a lo inhem hman a, banga chun fei chu a khaw bur ngur el a. Davida chu a tlan suok a, chu zan chun a him ta a.
11. Saula chun Davida chu a in tieng inchana zingkara that dingin mi a tir a. Davida nuhmei Mikal chun, "Voizan hin i hringna hum dinga i tlan naw chun zinga chu that ngei an ti che" a ta.
12. Mikal chun Davida chu tukver tieng an rel suoktir a, a tlan hmang a, a him ta a.
13. Mikal chun milem a lak a, khuma chun a'n zal a, puon a'n siltir a, a lu tieng chu kel hmulin a'n khum a.
14. Davida man dinga Saula mi tirhai an hung tlung chun Mikalin "A damnaw a nih" a lo ta.
15. Saula chun Davida en dingin a mihai chu a tir nawk a, an kuomah, "A khum pumin hung zawn unla, lo that ka tih" a ta.
16. Sienkhom, khum pindana a mi tirhai an lut chun khuma milem zal, a lu tieng kel hmula inkhum chu an hmu ta a.
17. Saula chun Mikal kuomah, "Ieng dinga mi dawhaa ka hmelma i'n suoktir am a na?" a ta. Mikal chun, " 'I mi'n rel suoktir naw chun ka that ding che a nih' a mi ti tlat annawm" a ta.
18. Him taka Davida a tlan suok hnung chun Rama khuoah Samuel kuomah a fe a, a chunga Saula thilthaw dan po po chu a hril a. Davida le Samuel chu Naioth-ahd an fe a, chu taka chun an um a.
19. Saulan Naioth-ah Davida a um ti a hung hriet chun man dingin mi a tir a.
20. Samuel rawia zawlnei ruolin thu hrila an insawi duol duol lai chu an va hmu a, Saula mihai chunga khom Pathien Thlarau a hung tlung a, insawi duol duolin thu an hril ve ta a.
21. Chu chu Saula an hril chun mi tam lem a tir a, anni khom chun thu an va hril ve ta duol duol a. Saula chun a voi thumnaah mi a tir nawk a, anni khom chun thu an va hril duol duol tho a.
22. A tawpah Saula ngei chu Rama khuo panin a'n thok suok a, Seku hmuna tuikul lien tak chu a va tlung a, "Samuel le Davida khaw lai am an um a?" tiin a'n don a, mihai chun, "Rama khuoa Naioth-ah an um" an ta.
23. Saula chunga khom Pathien Thlarau a hung tlung ve a, a fe pei a, Rama khuoa Naioth a tlung chenin thu a hril malam pei a.
24. Saula chun a silfen a hlip a, Samuel hmaa chun thu a hril ve ta muol muol a, chu ni le zankhuo chun saruokin a zal a. Chu lei chun, "Saula khom zawlnei lai a thang ve an ta?" ti tongkam hi a hung suok a nih.
←  1Samuel (19/31)  →