←  Psalms 69/150   →

---

منه نئجات ور، اي تاري، چونکي سولار بوينوما قدر يتئشئب.

.1

درئن باتاقليق پالچيغا باتيرام، دوراجاق ير ده يوخدور؛ درئن سولارا دوشموشم. سل مني باسيب.

.2

باغيرماقدان يورولموشام. بوغازيم قورويوب؛ تاريمي گؤزلَمکدن گؤزلرئمئن ائشيغي گدئب.

.3

مندن سببسئز نئفرت ادنلر باشيمين توکلرئندن داها چوخدور. حاقسيز يره مني يوخ اتمک ائسته‌ين دوشمنلرئم قووّتلي‌دئر. اوغورلاماديغيم شيي گري قايتارماغيمي ائسته‌يئرلر.

.4

اي تاري، عاغيلسيزليغيمي سن بئلئرسن، خاطالاريم سندن گئزلي ديئل.

.5

اي پروردئگار، قوشونلارين ربّي، قوي سني گؤزله‌ينلر منه گؤره اوتانماسينلار، اي ائسرايئلئن تاريسي، قوي سني آختارانلار منه گؤره روسواي اولماسينلار،

.6

چونکي سنئن خاطئرئنه گؤره حقارت آلتيندايام، روسوايچيليق اوزومو بورويوب.

.7

قارداشلاريما قرئب اولموشام، آنامين اوغوللارينا اجنبي اولموشام،

.8

چونکي سنئن اوئنئن قيرتي مني يانديريب تؤکور، سنه حقئر باخانلارين حقارتي منئم اوستومه دوشور.

.9

آغلاديم، جانيمي اوروجدا ساخلاديم، بو دا منه عاييب ساييلدي.

.10

پالاسي اؤزومه پالتار اتدئم، اونلارين مسخره‌سي اولدوم.

.11

دروازادا اوتوران آداملار، حاقّيمدا قيبت ادئرلر، عرقخورلارين نغمه‌سي اولموشام.

.12

آمّا من، يارب، سنه يالواريرام، خوشلانديغين زامان منه جاواب ور. اي تاري، محبّتئنئن بوللوغوندا، منه او يقئن نئجاتينلا جاواب ور.

.13

مني باتاقليق پالچيقدان قورتار، قويما باتيم؛ قوي مندن نئفرت ادنلرئن الئندن خئلاص اولوم، او درئن سولاردان.

.14

قويما سولارين سلي مني باسسين، قويما گئرداب مني اودسون، قويما قويو آغزيني اوستومه باغلاسين.

.15

منه جاواب ور، يارب، چونکي محبّتئن ياخشي‌دير. مرحمتئنئن چوخلوغونا گؤره منه طرف دؤن.

.16

اوزونو قولوندان گئزلتمه، چونکي دارليقدايام؛ تزلئکله منه جاواب ور،

.17

جانيما يتئش و اونو خئلاص ات، دوشمنلرئمدن اؤتري مني خئلاص ات.

.18

منئم حقارتئمي، اوتانديغيمي، روسوايچيليغيمي بئلئرسن. خصملرئمئن هاميسي سنئن حوضوروندادير.

.19

حقارت اوره‌يئمي سينديريب، دردلئيم. منه اوره‌يي يانان بئرئني آختاريرديم، آمّا هچ کس يوخ ائدي. تسلّي ورن بئرئني آختاريرديم، لاکئن هچ کسي تاپماديم.

.20

خؤرک يرئنه منه آجي شي وردئلر، سوسوزلوغومدا منه سئرکه ائچدئردئلر.

.21

قوي سوفره‌لري قاباقلاريندا تورا، دوستلاري بئر تله‌يه دؤنسون.

.22

گؤزلري قارالسين کي، آرتيق گؤرمه‌سئنلر. اونلارين بل‌لرئنه دائم لرزه سال.

.23

قهرئني اونلارين اوستونه تؤک، قوي قضبئن اونلاري توتسون.

.24

قوي اونلارين مسکني وئران اولسون، اونلارين چاديرلاريندا هچ کس ساکئن اولماسين.

.25

چونکي ووردوغون آداما عذاب ورئرلر، يارالاديغين آداملارين دردئنه گولورلر، يامانلاييرلار.

.26

اونلارين گوناهينين اوستونه گوناه آرتير، قويما سنئن صالحلئيئنه داخئل اولسونلار.

.27

قوي اونلارين آدلاري حيات کئتابيندان سئلئنسئن، آدلاري صالح آداملارلا يازيلماسين.

.28

لاکئن من فاغيرام، دردلئيم. قوي سنئن نئجاتين، اي تاري، مني اوجالتسين.

.29

تارينين آدينا بئر نغمه ائله حمد اوخوياجاغام، شوکورلرله اونو اوجالتاجاغام.

.30

بو، ربّه بوينوزلو-ديرناقلي اؤکوز و گاميشدان داها چوخ خوش گله‌جک.

.31

فاغير آداملار بونو گؤروب سوئنه‌جکلر؛ سئز، تاريني آختارانلار، اوره‌يئنئز دئرئله‌جک.

.32

چونکي رب کاسيبلارين سسئني اشئدئر، اسئرلئيه گدنلره حقارتله باخمير.

.33

قوي گؤي و ير اونا حمد اوخوسون، دهنزلر و اوندا اولان هر مؤوجود.

.34

چونکي تاري صحيونا نئجات وره‌جک، يهودا شهرلرئني بئنا اده‌جک کي، اونلار اوندا ساکئن اولوب اونا مالئک اولسونلار.

.35

قوللارينين نسلي ده اونا وارئث اولاجاق، اونون آديني سِوَنلر اوندا ساکئن اولاجاقلار.

.36

---

←  Psalms 69/150   →