←  Proverbs 14/31   →
حئکمتلي آرواد اِوئني تئکر، آمّا سفه آرواد اونو اؤز اللري ائله ييخار. .1
دوز يولدا گزن، ربدن قورخار، لاکئن يوللاريندان آزان، اونا خور باخار. .2
سفهئن آغزيندا تکبّور دَيَنَکي وار، آمّا حئکمتلي آداملارين دوداقلاري اونلاري حئفظ ادر. .3
اؤکوز اولمايان يرده آخور تمئز اولار، لاکئن محصولون بوللوغو اؤکوزون قووّتئندن گلئر. .4
حقئقي شاهئد يالان دمز، يالانچي شاهئدئن آغزيندان چيخان هر شي يالاندير. .5
رئشخند ادن حئکمت آختارار و اونو تاپماز، لاکئن فهئم آداما معرئفت تاپماق آسان‌دير. .6
آخماق آدامين قاباغيندان چيخ گت، چونکي اوندا معرئفت دوداقلاري تاپمازسان. .7
شوعورلو آدام حئکمتي ائله اؤز يولونو آنلايار، لاکئن آخماق سفه‌لئيي ائله اؤز-اؤزونو آلدادار. .8
سفه‌لر گوناها رئشخند ادرلر، آمّا ائلتئفات دوز آداملار آراسيندادير. .9
اورک اؤز دردئني بئلر، اونون شادليغينا ياد بئر آدام شرئک اولماز. .10
شر آداملارين اِوي يره ييخيلار، لاکئن دوز آداملارين يوردو چئچک آچار. .11
يول وار کي، آدامين قاباغيندا دوز گؤرونور، آمّا آخيري اؤلومدور. .12
گولرکن بله، اورک قملي اولا بئلر، شادليق بئتئنجه قوصّه گئنه گؤرونه بئلر. .13
اوره‌يئنده آزان اؤز يوللاري ائله دويار، لاکئن ياخشي آدام عمل‌لرئنئن عوضئني آلار. .14
جاهئل آدام هر سؤزه ائنانار، آمّا شوعورلو آدام قدملرئنه دئقّت ادر. .15
حئکمتلي آدام قورخار و پئسلئکدن دؤنر، آخماق آدام احتئياطسيز اولار و اؤزونه بل باغلار. .16
حؤوصله‌‌سئز سفه-سفه ائش گؤرر، حئيله‌گر آدامدان هامي نئفرت ادر. .17
جاهئل آداملارين مئراثي سفهلئکدئر، آمّا شوعورلو آدامين باشينا معرئفت تاجي قويولار. .18
پئس آداملار ياخشي آداملارين قاباغيندا، شر آداملار صالح آدامين قاپيسيندا تعظئم ادرلر. .19
يوخسول آدامدان قونشوسو دا نئفرت ادر، لاکئن وارلي آدامي سِوَن چوخدور. .20
قونشوسونو تحقئر ادن، گوناه ادئر، خوش او آدامين حالينا کي، مظلوملارا سخاوت گؤرسه‌دئر. .21
مگر شر قوران آداملار آزميرلار؟ لاکئن صالحلئک و وفا ياخشيليق دوشوننلرئندئر. .22
هر زحمتده بئر فايدا وار، آمّا بوش سؤزلر ائنساني احتئياجا سالار. .23
حئکمتلي آداملارين تاجي اونلارين ثروتئدئر، لاکئن آخماقلارين سفه‌لئيي آنجاق سفه‌لئکدئر. .24
حقئقي شاهئد جانلاري قورتارار، آمّا يالانلار دئين حئيله ائشله‌در. .25
ربدن قورخان تام آرخاييندير، اؤولادلارينين بئر پناهي اولاجاق. .26
ربدن قورخماق حيات بولاغي‌دير، آدامي اؤلوم تله‌لرئندن دؤنده‌رَر. .27
پادشاهين شؤوکتي خالقين چوخلوغوندادير، لاکئن مئلّتئن اولماماسينا گؤره، حؤکمدار يره ييخيلار. .28
گج قضبلنن آدامين بؤيوک فراستي وار، آمّا حؤوصله‌سئز آدام سفه‌لئک قالديرار. .29
راحات اورک بدنئن حياتي‌دير، لاکئن حسد سوموکلري چورودَر. .30
کاسيبا ظولم ادن آدام، اونو ياراداني حقئر گؤرر، آمّا اونا حؤرمت ادن، مؤحتاج آداما سخاوت گؤرسه‌در. .31
شر آدام اؤز پئسلئيي اوزوندن قووولار، صالح آدامين اؤلومونده بله، پناهي وار. .32
حئکمت فهئم اورکده اؤزونه راحات يووا قورار، آمّا آخماق آداملارين قلبئنده اولانلار آشکارا چيخار. .33
بئر مئلّتي صالحلئک اوجالدار، لاکئن گوناه هر خالق اوچون بي‌آبيرچيليق‌دير. .34
پادشاه عاغيلّي قولدان خوشلانار، لاکئن قضبي خجالت گتئرنه دوشر. .35
←  Proverbs 14/31   →