| ← Numbers 12/36 → |
| مريمله هارون موسانين اِولَندئيي کوشلو آرواددان اؤتري اونون ضئدّئنه دانيشديلار. چونکي موسا کوشلو بئر آروادي آلميشدي. | .1 |
| اونلار ددئلر: "مگر رب فقط موسانين واسئطه‌سئله دانيشدي؟ مگر بئزئم واسئطه‌مئزله ده دانيشمادي؟" و رب بونو اشئتدي. | .2 |
| موسا ير اوزونده ياشايان بوتون آداملاردان داها باشي آشاغي بئر ائنسان ائدي. | .3 |
| رب بئردن موسايا، هارونا و مريمه ددي: "اوچونوز ده حوضور چاديرينا گلئن." اوچو ده اورايا گتدئلر. | .4 |
| او زامان رب بولود دئره‌يئنده اِندي و چاديرين گئرئشئنده دوروب، هارونلا مريمي چاغيردي؛ هر ائکئسي ائره‌لي گلدئلر. | .5 |
| رب اونلارا ددي: "ائندي سؤزلرئمي اشئدئن؛ اگر آرانيزدا بئر پيغمبر وار، من رب رؤيادا اونا اؤزومو بئلدئره‌رم، يوخودا اونونلا دانيشارام. | .6 |
| آمّا قولوم موسا ائله اله اتمئرم؛ او منئم بوتون اِوئمده وفالي‌دير. | .7 |
| من اونونلا موعَمّالارلا يوخ، اوزبه اوز آچيق دانيشيرام و او ربّئن شَکئلئني گؤرور. نه اوچون قولوم موسانين ضئدّئنه دانيشماقدان قورخمادينيز؟» | .8 |
| ربّئن قضبي اونلارين ضئدّئنه آلوولاندي و اورادان گتدي. | .9 |
| لاکئن بولود چاديرين اوستوندن چکئلَنده مريم جوزاما دوچار اولوب، قار کئمي آغارميشدي. هارون مريمه باخديقدا گؤردو کي، او جوزاما توتولوب. | .10 |
| هارون موسايا ددي: "ای آغام، يالواريرام کي، آخماقليق و گوناه ائشله‌دئيئمئزه گؤره بئزي بو گوناه اوچون تقصئرکار سايما. | .11 |
| قويما کي، اونون بدني آنانين بطنئندن چيخان اؤلو دوغولموش اوشاغين ياري چوروموش بدنئنه بَنزه‌سئن." | .12 |
| موسا ربّه فرياد ادئب ددي: "يالواريرام، ای تاري، اونا شَفا ور!" | .13 |
| آمّا رب موسايا ددي: "اگر آتاسي اونون اوزونه توپورموش اولسايدي، مگر يدّي گون اوتانج ائچئنده قالمازدي؟ قوي مريم دوشَرگه‌دن اِشئک يدّي گون ساخلانسين، اوندان سونرا گری گتئرئله بئلر." | .14 |
| مريم يدّي گون دوشَرگه‌دن اِشئک ساخلاندي. او گری گتئرئلئنجه‌يه قدر جاماعات کؤچمه‌دي. | .15 |
| اوندان سونرا جاماعات خَصِروتدان يولا دوشدو و پاران صحراسيندا دوشَرگه سالديلار. | .16 |
| ← Numbers 12/36 → |