| ← Jonah 4/4 |
| آمّا بو ائش يونوسون هچ خوشونا گلمه‌دي و او حئرصلَندي. | .1 |
| او، ربّه دوعا ادئب ددي: "يارب! من حله اؤلکَمده ائکن مگر بونو دِمئردئم؟ بونا گؤره ده من تَرشئشه قاچديم، چونکي بئلئردئم کي، سن فيّاض و شَفقَتلي بئر تاريسان، گِج قضبله‌نَن و بول محبّتلي‌سن و رحم ادئب بلا گؤنده‌رمَزسن. | .2 |
| بونا گؤره ده يارب، يالواريرام، منئم جانيمي آل، چونکي منئم اوچون اؤلمَک ياشاماقدان داها ياخشي‌دير." | .3 |
| رب ددي: "حئرصلَنمَکله مگر ياخشي ائش ادئرسن؟!" | .4 |
| يونوس شهردن چيخدي و شهرئن شرق طرفئنده اوتوردو. اورادا اؤزونه چارداق دوزه‌لدئب کؤلگه‌سئنده اوتوردو کي، شهرده نه باش وره‌جيئني گؤرسون. | .5 |
| رب تاري يونوسون باشي اوستونه گَنه‌گَرچک بئتکئسي بئتئردي کي، بؤيويوب يونوسون باشي اوستونه کؤلگه سالسين و اونو پئس حاليندان قورتارسين. يونوس بو بئتکئيه گؤره چوخ سِوئندي. | .6 |
| لاکئن اِرته‌سي گون سحر تزدن تاري بئر بئتکي قوردو يتئردي. قورد بئتکئني يِيئب قوروتدو. | .7 |
| گونش چيخاندا تاري ائستي بئر کولَک شرقدن يتئردي. گونشئن ائستئسي يونوسون باشيني ووروب ياخدي و او، طاقتدن دوشدو. اؤزو اوچون اؤلوم آرزو ادئب ددي: "منئم اوچون اؤلمک ياشاماقدان داها ياخشي‌دير." | .8 |
| تاري يونوسا ددي: "بو بئتکئيه گؤره حئرصلَنمکله مگر ياخشي ائش ادئرسن؟!" او ددي: "اؤلمَيه قدر حئرصلي اولماغيم منه ياخشي‌دير." | .9 |
| او واخت رب ددي: "سن زحمتئني چکمه‌دئيئن و يِتئشدئرمه‌دئيئن، بئر گجه‌ده بئتَن و بئر گجه‌ده محو اولان بئتکئيه اوره‌يئن يانير. | .10 |
| بس من نجه نِينَوايا، بو بؤيوک شهره کي، صاغ اَلئني سول اَلئندن آييرا بئلمه‌ين يوز ائيئرمي مئندن چوخ ائنساني و چوخلو حيواني وار، اورَک يانديرماييم؟!" | .11 |
| ← Jonah 4/4 |