←  Genesis 17/50   →

---

اَبرام دوخسان دوقّوز ياشيندا اولاندا رب اونا گؤرونوب ددي: "قادئری- موطلق تاري منم. منئم حوضورومدا ياشا و قوصورسوز اول.

.1

عهدئمي اؤزومله سنئن آراندا قوياجاغام و نسلئني لاپ چوخالداجاغام."

.2

اَبرام اوزو اوسته دوشدو. تاري اونونلا دانيشيب ددي:

.3

"منه گلئنجه، باخ، سنئنله باغلاديغيم عهد بودور؛ سن بئر چوخ مئلّتئن آتاسي اولاجاقسان.

.4

داها سنه اَبرام ديئلمَيه‌جک، بو گوندن آدين ائبراهئم اولاجاق، چونکي سني چوخلو مئلّتئن آتاسي اده‌جيم.

.5

سني چوخ ثمره‌لي اده‌جيم، سندن مئلّتلر تؤره‌ده‌جيم و نسلئندن پادشاهلار چيخاجاقلار.

.6

اؤزومله سنئن و سندن سونراکي نسلئنئن آراسيندا ابدي عهدئمي برقرار اده‌جيم. من سنئن و سندن سونراکي نسلئنئن تاريسي اولاجاغام.

.7

بوتون کَنَعان تورپاغيني کي، اوندا قرئب کئمي ياشاييرسان، سنه و سندن سونراکي نسلئنه مولک اولاراق همئشه‌لئک وره‌جيم و اونلارين تاريسي اولاجاغام."

.8

سونرا تاري ائبراهئمه ددي: "سنه گلئنجه، سن و سندن سونراکي اؤولادلارين، نسئللر بويو عهدئمه باغلي قالاجاقسينيز.

.9

بودور منئم عهدئم کي، سنئنله و سندن سونراکي نسلئنله باغلاييرام و سئز اونو ساخلاياجاقسينيز، قوي آرانيزدا اولان بوتون اِرکَکلر ختنه اولونسون.

.10

ختنه اَتئنئزي کسئب آتين؛ بو منئمله سئزئن آرانيزدا اولان عهدئن علامتي اولاجاق.

.11

سئزه دوغولموش هر اِرکَک اوشاق، بوتون نسئللرده، سکّئزئنجي گون ختنه اولونار، هم ده سئزئن اِوئنئزده دوغولان بئر نؤکر يا دا سئزدن اولمايان و پولونان ساتين آلينان نؤکر کي، سنئن نسلئندن ديئل.

.12

اِوئنئزده دوغولموش و يا ساتين آلينميش هر اِرکَک نؤکر گرک ختنه اولونسون. بلجه منئم عهدئمئن علامتي ابدی اولاراق بدنئنئزده اولاجاقدير.

.13

لاکئن ختنه اَتي کسئلمه‌مئش هر اِرکَک، خالقينين آراسيندان قووولاجاق، چونکي او آدام عهدئمي سينديريب."

.14

تاري گئنه ائبراهئمه ددي: "آروادين سارايا آرتيق ساراي دميه‌جکسن. بوندان سونرا اونون آدي سارا اولاجاق.

.15

اونا برکت وره‌جيم و اوندان دوغرودان دا سنه بئر اوغول عطا اده‌‌جيم. سونرا اونا برکت وره‌جيم و او، مئلّتلرئن آناسي اولاجاق و خالقلارين پادشاهلاري اوندان دوغولاجاقدير."

.16

ائبراهئم اوزو اوسته دوشدو و گولوب اوره‌يئنده ددي: "مگر يوز ياشلي آدامين اوغلو اولا بئلر؟ مگر دوخسان ياشيندا اولان سارا دوغاجاق؟"

.17

سونرا ائبراهئم تارييا ددي: "کاشکي ائسماعئل سنئن حوضوروندا مقبول ياشاسايدي!"

.18

تاري دا ددي: "خيئر، آروادين سارا سنه بئر اوغول دوغاجاق و آديني ائسحاق قوياجاقسان. اونونلا و اوندان سونراکي نسلی ائله عهدئمي ابدی اولاراق برقرار اده‌جيم.

.19

ائسماعئله گلئنجه، اونون حاقّيندا ددئيئن سؤزلري ده اشئتدئم. باخ، اونا برکت وره‌جيم، اونو ثمره‌لي اده‌جيم، نسلئني لاپ چوخالداجاغام. او، اون ائکي ريئسئن آتاسي اولاجاقدير. اوندان بؤيوک بئر مئلّت تؤره‌ده‌جيم.

.20

لاکئن عهدئمي ائسحاقينان برقرار اده‌جيم کي، گلن ائل بو واخت سارا اونو سنه دوغاجاق."

.21

تاري صؤحبتئني ائبراهئمله بئتئرئب اوندان يوخاري چکئلدي.

.22

ائبراهئم اوغلو ائسماعئلي، اِوئنده دوغولان بوتون نؤکرلري، ساتين آلديغي هر کسی- اؤز اِوئنده هر اِرکَک آدامي گؤتوروب، همئن گون تارينين اونا ددئيي کئمي ختنه اَتلرئني کسدي.

.23

ختنه اَتي کسئلن واخت ائبراهئم دوخسان دوقّوز ياشيندا ائدي.

.24

اوغلو ائسماعئل ده ختنه اَتي کسئلن واخت اون اوچ ياشيندا ائدي.

.25

ائبراهئم اوغلو ائسماعئلله بئرلئکده همئن گون ختنه اولوندو.

.26

اونونلا بئرلئکده اِوده‌کي بوتون کئشئلر، اِوئنده دوغولان و ياد اِللردن ساتين آلينميش هر کس ختنه اولوندو.

.27

---

←  Genesis 17/50   →