Colossians 1/4   →

---

تارينين ائراده​‌سي ائله عئسا مسئحئن حوارئسي پولوس و تئموتاعوس قارداشدان،

.1

مسئحده کولوسئده اولان موقدّسلر و ائمانلي قارداشلارا. آتاميز تاريدان سئزه فيض و باريش اولسون.

.2

سئزئن اوچون دائم دوعا ادئب، ربّئمئز عئسا مسئحئن آتاسي تارييا شوکور ادئرئک.

.3

چونکي سئزئن مسئح عئسادا اولان ائمانينيزدان و بوتون موقدّسلره اولان محبّتئنئزدن خبردار اولدوق.

.4

سئزئن اوچون گؤيلرده ساخلانميش اومئددن اؤتري کي، اونو اوّلدن حقئقتئن کلاميندا، يعني ائنجئلده اشئتدئنئز.

.5

نجه کي، بوتون دونيادا اولدوغو کئمي، سئزئن ده آرانيزدا اشئتدئيئنئز و تارينين فيضئني حقئقتن درک اتدئيئنئز گوندن بري ثمره ورئب آرتير.

.6

نجه کي، اونو خئدمتده اولان سوگئلي اِپفراسدان اؤيره‌ندئنئز کي، بئزئم آديميزدا اؤزونو مسئحه قول اتمئش امئن خئدمتکاردير.

.7

و سئزئن موقدّس روحدا اولان محبّتئنئزدن ده اِله او بئزي خبردار اتدي.

.8

بو سببدن ده، بونو اشئتدئيئمئز گوندن سئزئن اوچون دوعا ادئب يالوارماقدان ال چکمئرئک، اِله کي، بوتون روحاني حئکمت و ائدراکدا اونون ائراده​سئنئن معرئفتي ائله دولاسينيز.

.9

اِله کي، ربّه لايئق بئر شکئلده رفتار ادئب، اونو هر جهتدن راضي اده​سئنئز و هر ياخشي ائشده ثمره گتئرئب، تاريني تانيماقدا ترقّي اده​سئنئز.

.10

و بوتون تحمّول و صبري اله گتئرمک اوچون اونون شؤوکتلي قووّتئنه موطابئق، بوتون قودرتله قووّتلنه​سئنئز و شادليقلا

.11

آتايا شوکور اده​سئنئز کي، نوردا بئزه ائقتئدار ورئب، اِله کي، موقدّسلرئن مئراثيندا شرئک اولاق.

.12

او بئزي ظولمتئن حاکئمئيّتئندن خئلاص ادئب، اؤز سوگئلي اوغلونون پادشاهليغينا کؤچورتدو کي،

.13

اوندا خئلاصيميز وار، يعني گوناهلارين باغيشلانماسي.

.14

و او، گؤزه گؤرونمه‌ين تارينين صورتي‌دئر، بوتون خئلقتئن ائلک دوغولاني.

.15

چونکي گؤيلرده و يرده هر شي، گؤزه گؤرونن و گؤرونمه‌ين اونون واسئطه‌سئله ياراندي، ائستر تختلر اولسون، ائستر حاکئمئيّتلر، ائستر رياستلر اولسون ائستر ائقتئدارلار، هر شي اونون واسئطه‌سئله و اونون اوچون يارانيب.

.16

او، هر شيدن ائره​لي‌دئر و هر شي اوندا قائمدئر.

.17

بدنئن يعني کئلئسانين دا باشي اِله او اؤزودور. او، باشلانيشدير، اؤلولر آراسيندان ائلک دئرئلن. اِله کي، او اؤزو هر شيده بئرئنجي اولسون.

.18

چونکي آتانين کفي بو ائدي کي، بوتون دولولوق اوندا ساکئن اولسون

.19

و اونون واسئطه‌سئله هر شيي اؤزو ائله باريشديرسين و اونون چارميخينين قاني ائله باريش حاکئم اتسئن، ائستر يرده اولان شيلري، ائستر گؤيلرده اولان شيلري.

.20

و سئزي ده، گرچي بئر زامانلار فئکئرده تاري ائله ياد و دوشمن و پئس عمللرده ائدئنئز،

.21

ائندي اؤز جئسماني بدنئنده اؤلوم واسئطه‌سئله باريشديريب کي، سئزي تارييا موقدّس، لکه​سئز و مذمّتسئز تقدئم اتسئن.

.22

اگر سئز دوغرودان ائمان اساسيندا مؤحکم و ثابئت دوراسينيز و اشئتدئيئنئز ائنجئلئن اومئدئندن جايماياسينيز کي، گؤي آلتيندا اولان بوتون خئلقته وعظ اولوندو و من پولوس اونون خئدمتکاري اولدوم.

.23

ائندي من سئزئن خاطئرئنئز اوچون چکدئيئم عذابلارا سوئنئرم و مسئحئن ذئلّتلرئندن آرتيق قالاني اونون بدني يعني کئلئسا اوچون اؤز جئسمئمده تاماملاييرام.

.24

من ده، تارينين سئزئن اوچون منه عطا اتدئيي وظئفه​يه گؤره، کئلئسانين خئدمتچئسي اولدوم کي، تارينين کلاميني کامئل بئر شکئلده يرئنه يتئرئم.

.25

يعني، او سئرّي کي، عصرلردن و نسئللردن گئزلي ائدي، لاکئن ائندي اونون موقدّسلرئنه ظاهئر اولوب.

.26

اونلارا کي، تاري ائراده اتدي کي، قيري‌يهودئلر آراسيندا اولان بو خئدمتئنئن شؤوکتئنئن دؤولتلئيئني بئلدئرسئن. يعني سئزده اولان مسئحي کي، شؤوکتئن اومئدي‌دئر.

.27

بئز ده مسئحي اعلان ادئب، بوتون حئکمتله هر کسه نصئحت ورئب، تعلئم ورئرئک کي، هر کسي مسئحده کامئل تقدئم ادک.

.28

اونون اوچون من ده زحمت چکئرم و ائچئمده قووّتله ائشله‌ين قودرتئنه موطابئق جهد ادئرم.

.29

---

Colossians 1/4   →