Philemon (1/1)

---

1.

Pauro, musungwa waKristu Jesu, naTimotio, hama yedu, kunaFiremoni, mudikanwa wedu nounobata nesu,

2.

nokunaApfia, hanzvadzi yedu, nokunaArkipo, murwi pamwe chete nesu, nokukereke iri mumba mako;

3.

Nyasha ngadzive nemi, norugare zvinobva kunaMwari, baba vedu, naShe Jesu Kristu.

4.

Ndinovonga Mwari wangu nguva dzose kana ndichikurangarirai paminyengetero yangu.

5.

Zvandinonzwa zvorudo rwako nokutenda kwaunako kunaShe Jesu nokuvatsvene vose;

6.

Kuti kugovana kokutenda kwako kuve nesimba Nokuzivisa zvakanaka zvose zviri mauri munaKristu Jesu.

7.

Nokuti tinomufaro mukuru nokunyaradzwa murudo rwako, nokuti moyo yavatswene yakavaraidzwa newe hama yangu.

8.

Naizvozvo, kunyange ndisingatongotyi munaKristu kukuraira kuita zvakafanira,

9.

kunyange zvakadaro, nokuda kworudo ndinoita zvokukumbira zvikuru, zvandakadai hangu, ini Pauro, mutana, vuye zvino musungwa waKristu Jesu.

10.

Ndinokumbira zvikuru kwauri pamusoro pomwana wangu, wandakabereka pakusungwa kwangu, Onesimo,

11.

wakanga asingakubatsiri kare, asi zvino unokubatsira zvikuru, iwe neni;

12.

wandatumirazve kwauri, naizvozvo iwe umugamuchire uyo uri vura hwangu chaibwo.

13.

ndaida kuti agare neni, kuti panzvimbo yako andishumire pakusungwa kwangu nokuda kweEvhangeri;

14.

asi ndakanga ndisingadi kuita chinhu, iwe usati watenda, kuti zvakanaka zvaungaita zvirege kuitwa nokurovererwa, asi nokuda kwako.

15.

Nokuti zvimwe wakaparadzaniswa newe chinguva nemhaka iyi, kuti ugozova naye nokusingaperi;

16.

arege kuzova muranda, asi munhu unopfuvura muranda, ave hama inodikanwa, munyama nomunaShe, zvikuru kwandiri, asi zvikuru kwazvo kwauri.

17.

Zvino kana uchiti ndiri mugovani newe, umugamuchire sezvaungandigamuchira ini.

18.

Asi kana akakuitira chinhu chisakarurama, kunyange anengava newe, undiravireni izvozvo.

19.

Ini Pauro, ndinozvinyora noruvoko rwangu, ndicharipa; ndisingarevi hangu kuti pamusoro pezvose unengava kwandiri, ndiyewe umene.

20.

Hongu, hama, ngandive nomufaro kwauri munaShe; uzorodze moyo wangu munaKristu.

21.

Ndinokunyorera, nokuti ndinotenda kuterera kwako, ndichiziva kuti uchaita vo kupfuvura pandinoreva napo.

22.

Asi ndigadzirire vopokugara, nokuti ndinotarira kuti muchandipiwa ini nokuda kwokunyengetera kwenyu.

23.

Epafrasi, musungwa pamwe chete neni munaKristu, unokukwazisa.

24.

NaMarko, naAristarko, naDemasi, naRuka, vanobate-basa pamwe chete neni.

25.

Nyasha dzaShe Jesu Kristu ngadzive nomweya wenyu.

---

Philemon (1/1)