| ← Psalms (98/150) → |
| 1. | Kumwail koulki apwoat koul kapwen ong KAUN-O; e ketin wiadahr soahng kapwuriamwei kei! Sang ni pein sapwellime manaman oh roson sarawi e ketin powehdier. |
| 2. | KAUN-O ketin lohkidahr sapwellime powehdi; e ketin kasalehiong wehi kan sapwellime manaman en komour. |
| 3. | E ketin dadaurete sapwellime inou ong mehn Israel kan ni loalopwoat oh limpoak poatopoat ong irail. Aramas koaros wasa koaros udiahlehr manaman en powehdi en atail Koht. |
| 4. | Kumwail koaros tohn sampah, kumwail koulki koulen peren ong KAUN-O; kumwail kapingahki amwail koul kan oh ngisingiski amwail peren! |
| 5. | Kumwail koul kapikapinga KAUN-O! Kumwail kesengki noumwail arp kan! |
| 6. | Kumwail peuk sowi oh koronida kan, oh ngisingiski amwail peren ong KAUN-O, atail nanmwarki. |
| 7. | A kumwail, sehd oh audepe kan koaros, kumwail pwungidekda; sampah oh towe kan koaros, kumwail kokoul! |
| 8. | Kumwail pillap akan, kumwail lopwolopw; kumwail dohl akan, kumwail iang koul pereperen mwohn KAUN-O, |
| 9. | pwehki e ketiket kodohng kaunda sampah. E pahn ketin kaunda tohn sampah ni mehlel oh pwuhng pahrek. |
| ← Psalms (98/150) → |