| ← Psalms (95/150) → |
| 1. | Kumwail patohdo, kitail kapinga KAUN-O! Kitail ngisingiski atail peren ong Koht me kin ketin sinsilei kitail! |
| 2. | Kitail patohwanlahng atail kapingkalahngan mwohn silangi oh pereperen kokoulki koulen kaping. |
| 3. | Pwe KAUN-O, iei Koht manaman emen, nanmwarki manaman emen me kin ketiket pohnangin koht akan koaros. |
| 4. | E kin ketin kakaun sampah pokon, sang pahn kepin sampah lellahng pohn kumwen nahna kan. |
| 5. | E kin ketin kaunda madau me e ketin wiahda, iangahki sahpw koaros me pein ih ketin kapikada. |
| 6. | Kumwail patohdo, kitail poaridi oh pwongih Koht; kitail kelehpwikihdi mwohn KAUN-O, me ketin wieikitailda! |
| 7. | Pwe ih me atail Koht; kitail sapwellime aramas me e kin ketin apwahpwalih, sapwellime pelin sihpw me e kin ketin katungoale. Kumwail rong dahme e mahsanih rahnwet: |
| 8. | “Kumwail dehr keptakaila, duwehte amwail pahpa kahlap ako nan Meripa, duwen irail rahno nan Massa en sapwtehno. |
| 9. | Mehnda ma re kilangehr ei doadoahk manaman akan rehrail, a re kasongosongieier wasao. |
| 10. | Erein pahr pahisek I wie nsensuwed pahn aramas pwuko. I ahpw nda, ‘Ia uwen arail soaloalopwoat! Re kahng kapwaiada ei kosonned akan.’ |
| 11. | I ahpw lingeringerkihda oh inoukihda ni kehlail, ‘Kumwail sohte mwahn pahn pedolong nan sahpwo wasa me I men kommoaleikumwaildiong ie.’ ” |
| ← Psalms (95/150) → |