| ← Psalms (85/150) → |
| 1. | Maing KAUN, komw ketin kupwurkalahnganongehr sapwellimomwi wehiet; komwi me ketin pwurehng kakepwehpwehla Israel. |
| 2. | Komw ketin mahkikihongehr dipen sapwellimomwi aramas akan oh ketin mahkohng arail sapwung kan koaros. |
| 3. | Komw ketin katokihedi sapwellimomwi kupwur toutou oh ketin wekideweisang irail sapwellimomwi engieng. |
| 4. | Maing Koht at sounkomour, komw ketin kasapahlkitodohng rehmwi, oh ketin katokihedi sapwellimomwi kupwur toutou ong kiht! |
| 5. | Ia duwe, komw pahn ketin engieng paht kohkohlahte? Omwi engiengen sohte pahn tokedi? |
| 6. | Komw ketin pwurehng kakehlaikitada, eri kiht, sapwellimomwi aramas akan, pahn kapikapinga komwi. |
| 7. | Maing KAUN, komw ketin kasaledohng kiht sapwellimomwi limpoak poatopoat, oh ketikihong kiht sapwellimomwi sawas en komour. |
| 8. | I kin patohwan rongorong dahme KAUN-O Koht kin ketin mamahsanih; e ketin inoukihong kitail popohl, ong pein sapwellime aramas akan, ma kitail sohte pahn pwurehng atail wiewiahn pweipwei kan. |
| 9. | Mehlel, e pahn kamourala me kin wauneki kan, oh sapwellime lingan en komour pahn ketiket nan sapwatail. |
| 10. | Limpoak oh loalopwoat ahpw pahn wiakihteieu kohdo; pwung oh popohl ahpw pahn tuhpene. |
| 11. | Atail loalopwoat ahpw pahn wosada sang nan sampah, oh pwungen Koht ahpw pahn iroirdihdo sang nanleng. |
| 12. | KAUN-O pahn ketin kakepwehpwehkitailla, oh wahnsapwatail kan pahn kaparaparala. |
| 13. | Pwung ahpw pahn kin tieng mwohn KAUN-O pwe en kaunopada sapwellime ahl. |
| ← Psalms (85/150) → |