← Psalms (39/150) → |
1. | I ahpw patohwan, “I pahn kin kanahieng ni ei wiewia kan oh sohte pahn mweidohng loweiet en kahrehiong ie nan dihp; I sohte pahn nda mehkot mpen aramas suwed kan.” |
2. | I nennenlahte sohte nda mehkot, mehndahte ma mehkot mwahu! Ahpw ei lokolok wonlahte mwowe, |
3. | oh lapalahn pwunod ehu ahpw kadirehla ngeni. Ni ei medemedewe, pwunod en nan kapehdiet lalaudlahte; ni ei sohla pwerieng pwunod wet, I ahpw patohwan, |
4. | “Maing KAUN, ia erein ei pahn momour? Iahd me I pahn mehla? Komw mahsanihong ie iahd me ei mour pahn imwisekla.” |
5. | Ia uwen mwotomwot en ei mour! Mwohn silangmwi ei mour likamwete sohte mehkot. Mehlelete me mour en aramas rasehng tumwenieng, |
6. | de rasehng mwete ieu. Mehkoaros me aramas kin wia sohte katepe; e kin kihpene nah mwohni kan, ahpw e sehse ihs me pahn nainekihla. |
7. | Eri a, ihs me I pahn koapworopworki, Maing ei Kaun? Pwe komwihte me I patohwan koapworopworki. |
8. | Komw ketin kapitasang ie nan dipei kan, oh dehr ketin mweidohng me pweipwei kan en kepitkin ie. |
9. | I pahn nennenla, sohte patohwan mehkot, pwe komwi me ketin kupwurehda I en patohwan ale soangen kalokolok wet. |
10. | Komw dehr ketin pwurehng kaloke ie! I nektehn mehkihla kalokolok sang nin limomwien. |
11. | Komw ketin kalokehki aramas engieng en silangmwi, oh ketin kamwomwala oh kasuwedihla rasehng loangenmwet mehkoaros me e kin poakohng. Mehlelete me aramas sohte siksang tumwenieng! |
12. | Maing KAUN, komw ketin karonge ei kapakap, komw ketin karonge ei likwer; komw ketin sewese ie ni ei kin sengiseng. Pwe ngehi mehnkeiru men mwohn silangmwi ni ahnsou mwotomwot, duwhte ei pahpa kahlap ako koaros. |
13. | Komw ketin kupwure ie I en kalapwukala ahnsou kis ahneki peren mwohn ei pahn patohsang met oh sohla mie. |
← Psalms (39/150) → |