←  Psalms (35/150)  →

---

1.

Maing KAUN, komw ketin uhwong irail kan me kin uhwong ie, oh ketin angiangih irail kan me kin men peiong ie.

2.

Komw ketikihda sapwellimomwi mehnsansar oh tehtehn peien oh ketido doareiehla.

3.

Komw ketikihda sapwellimomwi ketieu oh sile en mahwen oh uhwong irail kan me kin pwakipwakih ie. Komwi en inoukihong ie me komwi pahn doareiehla.

4.

Irail kan me kin nannantihong re en kemeiehla re en lohdi oh namenekla! Irail kan me kin koasoakoasone re en uhwong ie re en sarohdi oh pingida!

5.

Re en rasehng dipw meng me kisinieng kin ipirseli nindokon tohnleng en KAUN-O eh pahn pwakihirailpeseng!

6.

Alarail en rotala oh likekirisla, nindokon tohnleng en KAUN-O eh pahn kamwomwirailla!

7.

Re koasoanediong ie lidip ni so kahrepe oh weirada pwoahr loal ehu pwe re en koliehdi.

8.

Ahpw paisuwed en kamwomwmwomwla pahn lel irail ni arail sasairki; re pahn pein lohdiong nan arail lidip oh pwupwudi oh mwomwla.

9.

Eri, I pahn nsenamwahu pwehki KAUN-O; I pahn pereperen pwehki eh ketin doareiehla.

10.

I pahn patohwanohng KAUN-O sang loalei unsek, “Maing, sohte emen me duwehte komwi. Komw kin ketin silehsang me luwet akan me kehlail kan, me semwehmwe kan sang me kin kaloke irail akan.”

11.

Aramas suwed kan kin karaunlikamw ong ie oh kadipahkin ie dihp toutou kei me I so mwahn ese.

12.

Re kin dupungki ei wiewia mwahu me suwed, ngehi eri kin nan kapehd tikitikla.

13.

Ahpw ni ar soumwahuda, I pwuhriong nan likoun nsensuwed; oh pein kalokehkin ie kaisihsol; I kin poaridi wia ei kapakap,

14.

duwehte ei kin kapakapki kompoakepahi men de riei men. I kin kokohseli oh koskipene nsensuwed, duwehte emen me kin nsensuwedki kapilsalehdalahn ine.

15.

Ahpw nan ei apwal, re perenda oh keidohng mpei pwe re en kapailokei ie; mehn liki kan keme ie oh sohte tokedihsang wokiwokih ie.

16.

Re kangkakil ie masarail kan diren kailok, duwehte aramas me kin kouruhrki me nehtuk men.

17.

Maing KAUN, ia erein omwi pahn mamahsanihte? Komw ketin kapitiesang ar tiahk suwed kan; komw ketin doarehla ei mour sang laion pwukat.

18.

I ahpw pahn kapingkalahngan ong komwi mwohn pokon en sapwellimomwi aramas akan; I pahn kapinga komwi mwohrail koaros.

19.

Komw dehr mweidohng ei imwintihti kan, aramas likamw pwukan, en pereperenki ei lohdi. Komw dehr mweidohng irail kan me kin kailongkin ie ni so kahrepe, re en perenki ei pahtoulahr.

20.

Re sohte kin mwomwen lokaia kadek; ahpw ihte re kin kinehda soangen likamw koaros duwen aramas akan me kin ngoangki meleilei oh popohl.

21.

Re kedipa ie ni ngihl laud, ketihtihki, “Se kilang dahme ke wia!”

22.

Ahpw komwi, Maing KAUN, komwi me ketin mahsaniher met. Eri, Maing KAUN, komw dehr ketin nennenla; komw dehr ketin dohweisang ie!

23.

Maing KAUN, komw ketida oh ketin doareiehla; ei Koht, komw ketida oh ketin sewese ie nan ei kopwung.

24.

Maing KAUN, komwi me pwung, komw ketin kalohkihda duwen eh sohte dipei; komw dehr ketin mweidohng ei imwintihti kan en kepitki ei apwal.

25.

Komw dehr ketin mweidohng re en ndinda, “Kitail piseksangehr! Ih me kitail mwauhki!”

26.

Eri, irail kan me kin kepitki ei lokolok; re en lohdi oh pingida. Irail kan me kin kahski dene re mwahu sang ie re en namenekla oh sarohdi.

27.

Ahpw irail kan me men kilang pwungla mwahu en ei kopwung re en ngisingiski arail peren oh kapwukapwurehiong koasoi pwoatet, “Ia uwen lapalap en KAUN-O! Eh kin ketin kupwurperenki pweidahn sapwellime ladu.”

28.

I ahpw pahn patohwan lohkiseli sapwellimomwi pwung, oh pahn kin kapinga komwi sang nimenseng lel nipwong.

---

←  Psalms (35/150)  →