Psalms (31/150)  

1. Maing KAUN, I patohdo pahn kupwuromwi pwe komwi en ketin sinsile ie; komw dehr ketin mweidohng ie I en lohdi. Komwi Koht pwung men; I peki komwi en ketin doareiehla!
2. Komw ketin karonge ie! Komw ketin doare ie ahnsou wet! Komw ketin wiahla ei wasahn ruk pwe komwi en ketin sinsile ie; komw ketin wiahla kelepei, oh ketin doareiehla.
3. Komwi me ei wasahn ruk oh doarepei; komw kaweid ie oh kahluwa ie nin duwen me komw ketin inoukidahr.
4. Komw ketin sileiesang nan lidip me re wiahiongieier; komw ketin pereiesang nan keper.
5. I kin mweidohng pein ngehi nin limomwi kan. Maing KAUN, komw pahn ketin doareiehla, pwe komwi Koht loalopwoat emen.
6. Komwi kin ketin kalahdeki irail kan me kin kaudokiong koht likamw akan, a ngehi I kin likih komwi.
7. I pahn nsenamwahu oh pereperen pwehki sapwellimomwi limpoak poatopoat. Komw kin ketin mahsanih ei lokolok; komw pil ketin mwahngih ei apwal.
8. Komw sohte ketin mweidohng ei imwintihti kan en koliehdi; komw ketikihongieier saledek en patohseli wasa kan me I anahne.
9. Maing KAUN, komw ketin kupwure ie, pwe I milahr nan apwal; nan poaren mesei kat tihwokilahr ei kin sengiseng; I weikeklahr mehlel.
10. Solahr angi pwehki ei nsensuwed, oh sengiseng kamwotelahr mouri. I luwetkilahr ei apwal akan koaros, pil tih kat wie luhluwetala.
11. Ei imwintihti kan koaros, ahpw mehlel mehn mpei kan, kin mwamwahlikin ie. Irail kan me kin ese ie re masakielahr; ni ar kin kilang ie nanial, re kin tangdoaui.
12. Aramas koaros manokeielahr, duwehte ngehi aramas mehla men, I rasehng mehkot mwahl me aramas keselahr.
13. I kin rong mwenginingin en ei imwintihti tohto; kamasepwehk kin kapikapil ie! Re wie lamalamki ar pahn uhwong ie, re koasoakoasone duwen ar pahn kemeiehla.
14. Ahpw Maing KAUN, I kin likih komwi; komwi me ei Koht!
15. I kin patopato ni epwelipen nin limomwi kan ahnsou koaros; komw ketin doareiehla sang rehn ei imwintihti kan, oh pil sang irail kan me kin kaloke ie.
16. Komw ketin mahsanih sapwellimomwi ladu menet ni kupwur kalahngan; komw ketin doarehkiniehla sapwellimomwi limpoak poatopoat.
17. Maing KAUN, I kin likweriong komwi; komw dehr ketin mweidohng ie I en namenekla. Aramas suwed kan en namenekla; re en nennenla oh kohdilahng nan sapwen me melahr akan.
18. Komw ketin katokehdi me likamw akan, irail koaros me aklapalap oh kahngohdi, me kin mwamwahliki me pwung kan.
19. Meid kapwuriamwei soangen mwahu kan me komwi ketin nekinekidohng irail me kin wauneki komwi! Aramas koaros patohwan ese duwen omwi kupwur mwahu, ia uwen mwahu en omwi kin ketin sinsile irail kan me kin likih komwi.
20. Komw kin ketin karukihirailla mwohn silangmwi sang koasoandien aramas akan; komw kin ketin pereirailla wasa mwahu sang lokaia suwed en ar imwintihti kan.
21. Kapinga KAUN-O! Ia uwen kapwuriamwei en eh ketin kasalehda sapwellime limpoak ong ie ni ei imwintihti kan ar kapiliepene oh mahweniong ie!
22. I masepwehkada, I ahpw lemeleme me e ketin keseielahr sang mwohn silangi. Ahpw soh, pwe e ketin karonge ei likwer, ni ei patohwan peki sawasepei sang reh.
23. Kumwail poakohng KAUN-O, kumwail koaros sapwellime aramas loalopwoat akan! KAUN-O kin ketin sinsile me loalopwoat akan, e ahpw kin ketin kaloke me aklapalap akan.
24. Kumwail koaros me kin koapworopworki KAUN-O, kumwail kehlail oh kommwad.

  Psalms (31/150)