←  Psalms (27/150)  →

---

1.

KAUN-O me kamarainpei oh komourpei; I sohte pahn masak mehmen. KAUN-O kin ketin sile sang ie soahng keper kan koaros; I sohte pahn masak mehkot.

2.

Ma aramas suwed kan mahweniong ie, oh song re en kemeiehla, re kin dipekelekel oh pwupwudi.

3.

Mehnda ma karis en sounpei unsek pahn kapiliepene, a I sohte pahn masepwehkada; mehnda ma ei imwintihti pahn mahweniong ie, a I pahn likilikihte Koht.

4.

Mehteieu me I patohwan peki rehn KAUN-O; mehteieu me I kin anahne: I en kin mihmihte nan tehnpas en KAUN-O erein ei mour, pwe I en kin uduhdiahl sapwellime lingan, oh I en peki sapwellime kaweid kan wasao.

5.

E pahn ketin perepere ie ni ahnsou apwal; e pahn ketin sinsile ie nan Tehnpese, oh ketikidahng ie pohn dohl ileile.

6.

Eri, I ahpw pahn powehdi ei imwintihti kan me kapikapil ie. I pahn weriwerki ei peren ni ei pahn patohwan wia ei meirong nan Tehnpese; I pahn koul, I pahn kapinga KAUN-O.

7.

Maing KAUN, komw ketin karonge ie ni ei pahn likweriong komwi! Komw ketin kupwurkalahngan ong ie oh sapeng ie!

8.

Ni omwi mahsanih, “Kumwail kohdo rehi,” I ahpw sapeng, “Maing KAUN, I pahn patohwei.”

9.

Komw dehr karirihweisang ie silangmwi! Maing Koht ei sounkomour. Komw dehr engieng pahi; komw dehr ketin soikala sapwellimomwi ladu menet. Komwi me sawasepei; komw dehr ketin sohpeisang ie, komw dehr ketin melieiehla.

10.

Semei oh inei pil kak keseiehla, ahpw KAUN-O pahn ketin apwahpwalih ie.

11.

Maing KAUN, komw ketin padahkihong ie kupwuromwien, oh ketin kahluwa ie nan ahl inen, pwe ei imwintihti kan me ngeder.

12.

Komw dehr ketin likidmelieiehla rehn ei imwintihti kan, me kin pelian kin ie lokaia kamasepwehk oh lokaia likamw.

13.

Eri soh, I ese me I pahn momourte pwe I en kilang sapwellimen KAUN-O kalahngan nan ei mour en ahnsou wet.

14.

Likih KAUN-O! Ahneki pwoson, dehr nan kapehd tikitikla. Likih KAUN-O!

---

←  Psalms (27/150)  →