| ← Psalms (21/150) → |
| 1. | Maing KAUN, at tungoal nanmwarki kupwurpereperen, pwehki roson me komw ketikihong; e ketin pereperenki omwi ketin kupwurehda pwe en powehdi. |
| 2. | Komw ketikihongehr anahn en kupwure; komw ketin sapengehr sapwellime pekipek. |
| 3. | Komw ketidohngehr reh oh ketikihongehr kupwuramwahu tohto oh ketikidiongehr pohn tapwi nihn kohl ehu. |
| 4. | E patohwan peki rehmwi mour, a komw ahpw ketikihongehr, mour werei oh poatopoat. |
| 5. | Lingan en mware me lapalap pwehki sapwellimomwi sawas; komwi ketikihong ih ndand oh roson. |
| 6. | Sapwellimomwi kapai kan kin ieiang ih kohkohlahte, oh omwi kin ketin ieiang ih kin kaparanda. |
| 7. | Nanmwarkio kin likih KAUN-O, Wasa Lapalap; oh pwehki sapwellimen KAUN-O limpoak poatopoat e pahn kin koapworopwor oh saledek ahnsou koaros. |
| 8. | Nanmwarkio pahn ketin kalowehdi sapwellime imwintihti kan koaros; oh e pahn ketin salihedi koaros me kin kailongki. |
| 9. | E pahn ketin kamwomwirailla duwehte kisiniei mwehl ni eh pahn ketin pwarada mwohn masarail kan. KAUN-O pahn ketin kasohreirailla nan sapwellime engieng oh kisiniei pahn kamwasikeirailla. |
| 10. | Sohte emen kadaudokarail pahn pitla. nanmwarkio pahn kemehla irail koaros. |
| 11. | Re kin wia ar koasoandi kan, koasoandi suwed en uhwong ih, ahpw re sohte pahn pweida. |
| 12. | E pahn ketin kasikihkin irail sapwellime arep oh pahn kahrehiong ar pweiekla oh tangdoaui. |
| 13. | Maing KAUN, se patohwan kapinga komwi, pwehki sapwellimomwi roson lapalap! Se pahn koul oh kapinga sapwellimomwi manaman. |
| ← Psalms (21/150) → |