←  Psalms (147/150)  →

---

1.

Kapinga KAUN-O! Meid mwahu koulki melkahka en kaping ong atail Koht; meid kansenamwahu oh pwung kapinga ih.

2.

KAUN-O ketin onehda sapahl Serusalem; e ketin kasapahldohr me kalipilipala kan.

3.

E ketin kamwahwihalahr me nan kapehd ohlahr akan oh ketin kidimpenehr ar ohla kan.

4.

Ih me kin ketin koasoanehdi tohtohn usu kan oh ketikihong eden ehuehu usu.

5.

Atail Kaun me lapalap oh roson; sapwellime kupwurokong sohte kak sosohngdi.

6.

E kin ketin kasapwilada me aktikitik kan, eh ahpw kin ketin tiakdiong aramas suwed akan nanpwel.

7.

Kumwail koulki koulen kaping ong KAUN-O; kumwail kesengki arp ong atail Koht.

8.

E kin ketin kamwarakpeseng depwek kan pahnlahng; e kin ketin kamwerediong keteu pohn sampah oh kin ketin kawosehda dihpw pohn dohl akan.

9.

E kin ketikihong mahn akan arail kisin tungoal oh kin katungoale kisin menpihr kan ni ar kin sengisengki ar men mwenge.

10.

E sohte kin kupwurperenki kehlail en oahs akan, de kommwad en sounpei kan;

11.

ahpw e kin kupwurperenki irail kan me kin wauneki, irail kan me kin koapworopworki sapwellime limpoak poatopoat.

12.

Serusalem, kapinga KAUN-O! Saion, kapinga omw Koht!

13.

E kin ketin silehdi mwahu omw ewen kehl kan; e kin ketin kupwuramwahwih noumw aramas akan.

14.

E kin ketin sinsile irepen omw wehi oh kin katungoalehkin kumwail pilawa me keieu mwahu.

15.

Ni eh kin ketin koasoanediong sampah mehkot, koasoandio kin mwadangete pweida.

16.

E kin ketin kadaridi sinoh duwehte pilangkes ehu oh kamwarak pwoaik rasehng pwelpar.

17.

E kin ketin kadaridi keteu aihs takai duwehte rakied; oh sohte me kakohng kepeu me e kin ketin kadarodo!

18.

Eri, e kin ketin mahsente, a ais kin peipeseng; e kin ketin kadar kisinieng, a pihl kin pwilipwiliwei.

19.

E kin ketin poahngokohng sapwellime aramas akan, sapwellime kaweid oh kosonned kan ong Israel.

20.

E sohte ketin wiahiong met wehi teikan; re sohte ese sapwellime kosonned akan. Kapinga KAUN-O!

---

←  Psalms (147/150)  →