←  Psalms (114/150)  →

---

1.

Ni ahnsou me mehn Israel mweselsang Isip, kadaudok en Seikop kan mweselsang sapwen likio,

2.

Suda wiahla sapwellimen KAUN-O aramas sarawi kei, Israel wiahla sapwellime.

3.

Sehd Weitahtao kilangadahte oh tangdoaui; Pillap Sordan tokedihsang eh pwilipwilwei.

4.

Nahna kan mwusimwusikek rasehng kuht kei; dohl akan lusulusseli duwehte sihmpwul kei.

5.

Sehd? Dahme ke tangkidoaui? Ah kowe Sordan, dahme ke pweiengkihdi sohla pwilipwilwei?

6.

Kumwail nahna kan, dahme kumwail mwusimwusikengki duwehte kuht kei? Oh kumwail dohl kan, dahme kumwail lusuluskiseli duwehte sihmpwul kei?

7.

Kowe, sampah, ke en rerrada ni KAUN-O eh pahn ketido, ke en rerrada mwohn silangin Koht en Seikop,

8.

me kin ketin wekidohng takai kan ni pwarer en pihl oh paip akan ni kahng en pihl.

---

←  Psalms (114/150)  →