| ← Psalms (111/150) → |
| 1. | Kapinga KAUN-O! I pahn kasapahlkalahngan ong KAUN-O sang nan kapehdi unsek mwohn pokon en sapwellime aramas akan. |
| 2. | Ia uwen kapwuriamwei en soahng kan me KAUN-O kin ketin wia! Koaros me kin perenkihda kin men wehwehkihla mehlel. |
| 3. | Sapwellime wiewia kan koaros kin diren wahu oh roson; sapwellime pwuhng me poatopoat. |
| 4. | KAUN-O sohte ketin mweidohng kitail en manokehla sapwellime wiewia kapwuriamwei kan; ih me kupwur kadek oh kalahngan. |
| 5. | E kin ketikihda kisin tungoal ong irail kan me kin wauneki; e sohte kak meliehla sapwellime inou. |
| 6. | E ketin kasalehiong sapwellime aramas akan sapwellime manaman ni eh ketikihong irail sapwen mehn liki kan. |
| 7. | E kin ketin loalopwoat oh pwung ni soahng koaros me e kin ketin wia; sapwellime kosonned kan sohte kin wekidekla. |
| 8. | Re kin wie poadopoad kohkohlahte; pwe re poahsoankihda mehlel oh pwung. |
| 9. | E ketin kasaledekala sapwellime aramas ako oh ketin wiahiong irail inou poatopoat ehu. Ih me sarawi oh manaman! |
| 10. | Elen loalokongla iei wauneki KAUN-O; e kin ketin kupwurokong en wia kadeik pwung ong irail kan me kin wauneki. Kapingpe pahn wiewiawi kohkohlahte. |
| ← Psalms (111/150) → |