Psalms (107/150)  

1. “ Kitail kapingkalahngan ong KAUN-O, pwehki ih me kalahngan; sapwellime limpoak kin poatopoatete!”
2. Kuwmail koaros me e ketin kamouralahr, kumwail pwurehng kapwurehiong mahsen en kapingkalahngan pwukat ong KAUN-O. E ketin kapitkumwaillahr sang amwail imwintihti kan
3. oh ketin kasapahlkumwaildo sang sapwen liki kan, sang ni mesenleng oh kepinleng, sang ni paliepeng oh palieir.
4. Ekei irail sansalongselier nan sapwtehn sohte kak diarada kahnimw ehu me re pahn kousoanla ie.
5. Nan ar duhpeklahr oh men nimpildahr e ahpw sohla ar koapworopwor.
6. Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.
7. E ketin kahluwa irail nan ahl inenen ong nan kahnimw me re en kousoan ie.
8. Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.
9. E kin ketin kanimpilehda me men nimpildahr akan oh kin ketin katungoalehkihda kisin tungoal mwahu me men mwengedahr akan.
10. Ekei mihmiher nan ar nsensuwed oh rotorot, re senselki selmete oh wie lokolok,
11. pwehki ar kahngohdiong kosonned en Koht, Wasa Lapalap, oh soikeweisang rehrail sapwellime kaweid kan.
12. Solahr angirail pwehki ar doadoahk laud; re ahpw kin pwupwudi, oh sohte me men sewese irail.
13. Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.
14. E ahpw ketikinirailsang nan ar nsensuwed oh rotorot, oh ketin kamweidpeseng seliparail kan.
15. Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.
16. E kin ketin kauwehla wenihmw mete kan oh ketin sukpeseng kateng metehn wenihmw kan.
17. Ekei me pweipwei oh soumwahukihda diparail kan re ahpw wie lokolongki ar sapwung kan;
18. re kin men mwuski soangen kisin tungoal akan oh re kereniong mehla.
19. Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.
20. E ketin kamwahwihkinirailla sapwellime mahsen oh ketin kapitirailla sang nan sousou.
21. Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.
22. Re uhdahn pahn kasapahlkalahngankihong ar meirong kan, oh ngisingiski ar peren oh lohlohkiseli wiepen nin lime kan.
23. Ekei kin dake sohp seiseiloakseli nan madau kan, raparapahkiseli arail mour.
24. Re udiahlehr dahme KAUN-O kak wia, wiepen nin lime kapwuriamwei kan nan madau.
25. E ketin mahsente, a iet melimel wiawiher, oh kamwakidada iloak kan.
26. Sohp kan kin kepihrdahng nan wehwe oh lekdekdiong nan kepin madau; kapehdirail ahpw tikitingkihla duwen ar keper.
27. Re ahpw dipekelekel oh weuwasasseli, likamwete aramas sakaula kei-% ar koahiek en nan madau sohla katepe.
28. Re ahpw likweriong KAUN-O sang nan ar apwal, e ahpw ketin doareirailla sang nan ar lokolok kan.
29. E ketin kamwelehdi wasa, oh kameleileidi iloak kan.
30. Re ahpw nsenamwahukihla mwelehdien madawo, oh e ketin kahluwairailwohng ni wasa me re seiseiloakwohng ie.
31. Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr.
32. Re uhdahn pahn kalohki roson lapalap wet nan pokon en aramas akan oh kapinga mwohn wie kupwur en me mah kan.
33. KAUN-O ketin kammadahda pillap akan oh ketin katokehdi utuhnpihl kan pwe en dehr pwilipwiliwei.
34. Oh sahpw kaselel kan e ketin wekidohng ni sapwtehn en soahl pwehki suwedlahn towe kan.
35. E ketin kawikala sapwtehn kan kawekiong ni lehn pihl, oh sahpw madekeng kan ni utuhnpihl.
36. E ahpw ketin mweidohng me duhpeklahr akan re en kousoanla wasa ko, re ahpw kauwada ie kahnimw ehu, pwe re en kousoanla ie.
37. Re ahpw sapwasapwala ie oh koadoahkihada ie ar mwetin wain me kapwarehda wah mwahu tohto.
38. E ahpw ketin kupwuramwahwih sapwellime aramas ako, re ahpw kaparaparala kowahlap; oh e pil ketin kangederehla neirail mahn akan.
39. Ni sapwellimen Koht aramas ako ar lohdi oh sarohdi, pwehki apwal mwuledek oh kehnaudek,
40. e ketin kasalehda eh sohte ketin kupwurohki kupwur en sohpeidi ko me kahpwalahla sapwellime ko; iei me e ketin wia pwe re en kakahnseli nan sapwtehn, wasa me sohte ahl kin dierek ie.
41. Ih eri ketin kapitala me paisuwed akan sang nan ar apwal oh ketin kangederehla tohn arail peneinei duwehte pelinmen kei.
42. Me pwung kan kin kilang met, oh re kin nsenamwahukihla, a me suwed kan kin nennenlahte, sopeimwekid.
43. Me loalokong kan en medemedewe mepwukat; re en pil medemedewe sapwellimen KAUN-O limpoak poatopoat.

  Psalms (107/150)