| ← Psalms (102/150) → |
| 1. | Maing KAUN, komw ketin karonge ei kapakap, oh ketin karonge ei likwer en pek sawas! |
| 2. | Ni ei mi nan apwal, komw dehr ketin sohpeisang ie! Komw ketin karonge ie, oh ketin sapeng ei likwer ni ahnsou mwadang! |
| 3. | Ei mour sosohralahr rasehng ediniei; paliwereiet mwasimwasik rasehng kisiniei. |
| 4. | I mengidier duwelahr dihpw me mengilahr; solahr ei ineng en tungoale mehkot. |
| 5. | I patohwan weiweirek laud; solahr mehkot ni paliwereiet ihte kiliette oh tih kat. |
| 6. | I rasehngehr menpihr lawalo men nan sapwtehn, rasehng likoht emen nan mohn ihmw kan. |
| 7. | I kin wonohn wie pepehd; I duwelahr menpihr men me kalakalapwuk pohn pwelengen ihmw. |
| 8. | Ei imwintihti kan kin kepwkepweikengih ie sang nimenseng lel nipwong; irail kan me kin lahlahwe ie kin keriahla aramas ni edei. |
| 9. | Pwehki omwi engieng mwuledek, pehs me wialahr ei tungoal kisin mwenge, oh pilenmesei kat doaloalahr nimei pihl. Komw ketin pwekiedahr oh ketin keseielahr. |
| 10. | Pwehki omwi engieng mwuledek, pehs me wialahr ei tungoal kisin mwenge, oh pilenmesei kat doaloalahr nimei pihl. Komw ketin pwekiedahr oh ketin keseielahr. |
| 11. | Ei mour rasehngehr mwete en soutik; I duwelahr dihpw me mengidier. |
| 12. | Ahpw komwi, Maing KAUN, komwi me nanmwarki kohkohlahte; dih koaros pahn kin tamataman komwi. |
| 13. | Komw pahn ketida oh ketin poakehla Saion; e lelehr ahnsowo me komw pahn ketin kupwurehla; eri ih ahnsou mwahwo met. |
| 14. | Sapwellimomwi ladu kan kin poakohng Saion, mehnda ma e kamwomwomwlahr; re uhdahn poakehla, mehnda ma e rengkpesengehr. |
| 15. | Wehi kan pahn masak KAUN-O; nanmwarki koaros en sampah pahn masak sapwellime manaman. |
| 16. | Ni ahnsou me KAUN-O pahn ketin onehda sapahl Saion, e pahn ketin kasalehda sapwellime roson lapalap. |
| 17. | E pahn ketin karonge sapwellime aramas me lekdeklahr akan oh karonge ar kapakap. |
| 18. | Ntingihediong dih kan me pahn kohdo mwuhr dahme Koht ketin wiadahr, pwe aramas akan me saikinte ipwidi re en kapinga. |
| 19. | KAUN-O ketin mahsendihdo sang nan mwoale sarawi wasa ile, e ketin mahsendidohng sampah sang nanleng. |
| 20. | E ahpw ketin karongehda weirek en me sensel kan oh ketin kasaledekala me koasoandier en kamakamala kan. |
| 21. | Eri, mware pahn uhdahn lohkseli nan Saion, oh kapingpe pahn wiawi nan Serusalem |
| 22. | ni ahnsou me wehi kan oh nanmwarki kan pahn pokonpene oh wia kaudok ong KAUN-O. |
| 23. | KAUN-O ketin kaluweteiehla ni ahnsou me I wie pwulopwulte; e ketin kamwotehla ei mour. |
| 24. | Maing ei Koht, komw dehr ketikihsang ei mour met mwohn ei pahn likeilapala. Maing KAUN, komwi kin ketin ieias kohkohlahte. |
| 25. | Komw ketin kapikada sampah mahsie, oh pein nin limomwi kan me ketin wiahda nanleng. |
| 26. | Soahng pwukat pahn sohrala, a komwi pahn duweduwehte; re pahn meringla duwehte likou. Komw pahn ketin keseirailla rasehng likou, oh re pahn sohrala. |
| 27. | Ahpw komwi pahn ketin duweduwehte, oh sapwellimomwi ieias sohte pahn imwisekla. |
| 28. | At tungoal seri kan pahn mour meleilei oh kadaudokarail kan pahn mour tengeteng, pahn epwelpen nin limomwi kan. |
| ← Psalms (102/150) → |