| ← Job (39/42) → |
| 1. | Ke ese ahnsou me kuhten wel kan kin ipwidi? Ke kin tehk duwen tiehn wel kan ar kin neitik? |
| 2. | Ke kin ese wadek sounpwong en ar liseian, oh ahnsoun ar pahn kin neitik? |
| 3. | Ke kin ese ahnsou me re pahn wendi oh kaipwidi wahnedirail kan? |
| 4. | Ke ese duwen ar kin apwalih oh kakairada wahnedirail kan nanwel, oh duwen ar kin tohrohrala sang irail oh sohla pwurodo? |
| 5. | Ihs me kihong saledek rehn ahsen nanwel kan? Ihs me kin lapwairailda pwe re en kin sansaledekseli? |
| 6. | Ngehi me kihong irail dewerail nan sapwtehn, oh nan mall akan pwe re en kin kousoan ie. |
| 7. | Re kin dohla sang mwoarong en kahnimw kan, oh sohte me kak kamandairailla oh koadoadoahkih irail. |
| 8. | Nahna kan, iei wasa re kin mwenge ie, wasahn ar rapahki kanarail dihpw. |
| 9. | Ia duwe, kou lawalo kan pahn men doadoahkohng uhk, de re pahn men kin pweidi nan dewen mahn akan rehmw? |
| 10. | Ke kak salihedi tumwe oh doadoahngki pwe en deipwelihada sapwomw, oh kapatapatahla? |
| 11. | Ke kak koapworopworki eh kehlail laud, oh likihong omw doadoahk toutou kan? |
| 12. | Ke lemeleme me e pahn wahdo rehmw wahnsapwomw, oh rikpene wahn wihd nan omw wasahn kamwakele wahn wihd? |
| 13. | Ia uwen pitipit en likapip en soangen mahn me adaneki ostris! Ahpw sohte ostris men kin kak pihr duwehte sidoahk. |
| 14. | Ostris kin kutoahrdiong nanpwel, pwe karakar en pwehl en kin sewese kasawa eh kutoahr kan. |
| 15. | E kin sasairki me kutoahre kan kak tiatipeseng, oh mahn lawalo kan kak kangala. |
| 16. | E sohte kin tehk kutoahre kan, oh sohte kin nsenohki ma sohte epwelparail. |
| 17. | Eri, iei ngehi me wiahda en kin mwomwen pweipwei, oh I sohte kihong en loalokong. |
| 18. | Ahpw ni eh kin tapihada tang, e marahrahsang oahs me aramas kin dake. |
| 19. | Ih kowe, Sohp, me kin kihong oahs akan ar kehlail, oh kin kalinganahki pohn tepinwararail wune kan? |
| 20. | Ih kowe me kin kalus irail, rasehng loukust kei, oh kamasangki aramas akan ngilen nan tumwarail? |
| 21. | Re kin sarepki pehrail pwehl nan wahu kan, nan mahwen re kin tenge ar imwintihti kan ni uwen ar kehlail koaros. |
| 22. | Re sehse dahkot masepwehk, oh sohte kedlahs pwoat kak kapweiekiraildi. |
| 23. | Tehtehn mahwen kan rehn soundake oahs akan kin sekesek oh piripir pahn ketipin. |
| 24. | Oahs akan kin rerrerki ar saloh nan mahwen, ahpw re kin wonlahte mwowe; ni ngilen sowi eh kin pepeuk, sohte me kak kapweiekiraildi. |
| 25. | Ni ar kin rongada ngilen sowi, re kin sapengki ngilen nan tumwarail. Ni arail dohsang mahwen, re kin kehnda dahpekpenehn karis kan, oh re kak rong ngilen kaunen sounpei kan ar ruruwes. |
| 26. | Ia duwe, kowe me padahkihong oahk mwomwen eh pahn pihr, ni eh kin kihpeseng peh kan pwe en pihrlahng palieir? |
| 27. | Ih kowe me kin ruwese ikel kan en wiahda pasarail kan wasa ilehn nahna kan? |
| 28. | Pasarail kan kin wiawihda pohn paip keieu ile kan, oh dewerail kan kin mi ni kumwen nahna apwal kan. |
| 29. | Re kin mi wasao ireirong wasa keren oh wasa doh kan, dahme re kak saikedi kanarail. |
| 30. | Wasa me mehla ehu kin mi ie, re kin pokonpene ie; oh kisin ikel tikitik kan kin medkihla ntahn me mehla kan. |
| ← Job (39/42) → |