| ← Job (14/42) → |
| 1. | Kitail koaros ipwidi luwet. Aramas koaros ahneki soangen mourteieu me mwotomwot oh diren apwal |
| 2. | Kitail kin keirda oh mengidi, rasehng wahnrohs kan; kitail kin sohrala duwehte mwete. |
| 3. | Maing Koht, ia duwe, komw pahn ketin kupwukupwure ie, de malipeiewohng rehmwi pwe I en pakadeikda? |
| 4. | Sohte mehkot mwakelekel kak kohsang ni mehkot samin duwehte aramas. |
| 5. | Reireien ahnsoun eh mour kin kileldier mwohn eh pahn imwisekla-% sounpwong depe e pahn momourki. Komw ketin kileledier, oh sohte me pahn wekidala. |
| 6. | Komw ketin sohpeiweisang pwe en kelehpwla, oh mweidohng en pereperenki eh mour apwal, ma e kak. |
| 7. | Mie koapworopwor nin tuhke pwoat me paldier, e kak pwurehng mourda oh wosada. |
| 8. | Mehnda ma kalewe kan mahlahr, oh paliweren tuhkeo mwoasoangotalahr nanpwel, |
| 9. | pihl kak kawosehda pwe en wiahla tuhke kapw pwoat. |
| 10. | Ahpw aramas emen kin mehla, oh iei met imwilahn mehkoaros reh; e kin mehla, oh ia ih met? |
| 11. | Ahnsou ehu pahn kohdo me pillap akan pahn tokedihsang pwilipwiliwei, oh pilen madau kan pahn pil madada, |
| 12. | ahpw me melahr akan sohte pahn mourda. Re soh mwahn pahn pwourda nindokon lahng eh pahn mihmiehte; re soh mwahn pahn pirida sang ar meir. |
| 13. | I ahpw men komwi en ketin nekidiehla nan sapwen me melahr akan; komw ketin karirihiehla, omwi engieng lao tokedi, komwi ahpw ketin kilelehdi ahnsou me komwi pahn ketin taman ie. |
| 14. | Ma aramas emen pahn mehla, e kak pwurehng mourda? Ahpw I pahn awiawihete ahnsou mwahu sang met, oh kasikasik ahnsou apwal wet lao sohrala. |
| 15. | Eri, ahnsowo, komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda, wiepen nin limwomwiet. |
| 16. | Ahnsowo komw pahn ketin mwasamwasahn kahk koaros en ei mour, ahpw komw sohte pahn ketin kupwukupwure dipei kan. |
| 17. | Komw pahn ketin mahkikihong ie dipei kan oh ketin kasohrehla; komw pahn ketin irisala sapwung koaros me I wiadahr. |
| 18. | Ahnsou ehu pahn kohdo me nahna kan pahn pwupwudi oh paipalap akan pahn tohrek sang ar wasa kan. |
| 19. | Pihl kan pahn koupwoarepeseng paip akan, oh keteu mosul kan pahn kangasang pwelen sahpw akan; ih duwen omwi kin ketin kasohrehla en aramas ar koapworopwor ong mour. |
| 20. | Komw kin ketin powehdi aramas oh kadarala kohkohlahte; mese kin mwomwsuwedla ni eh kin mehla. |
| 21. | Nah seri kan kin ale wahu, ahpw e sohte mwahn kin ese; re kin paisuwedla, a sohte me kin ndahng. |
| 22. | Ihte me e kin pehm, medek en paliwereo, oh nsensuwed en nan kapehde. |
| ← Job (14/42) → |