Jeremiah (31/52)  

1. KAUN-O ahpw mahsanih, “Ahnsou ehu pahn kohdo me I pahn wiahla Koht en kadaudok koaros en Israel, oh irail koaros pahn wiahla nei aramas.
2. I kasalehiongirailehr me pitsang mehla nan sapwtehno ei kalahngan. Ahnsou me mehn Israel ko raparapahki ar wasahn kommoal,
3. I kasalehiong irail pein ngehi sang wasa doh. Mehn Israel kan, I poakohng kumwail ahnsou koaros, ihme I pahn kadakadaurkihte ei limpoak poatopoat ong kumwail.
4. I pahn pil pwurehng oneikumwailda. Kumwail pil pahn pwurehng ale noumwail keseng kan oh kahkahlengki amwail peren.
5. Kumwail pahn pwurehng koadoahkihada amwail mwetuwel en wain kan ni keilen dohlen Sameria, oh irail me pahn koadoahkihada mwetin wain pwukat pahn kang wah kan.
6. Ei, ahnsou ehu pahn kohdo me silepe kan pahn likwerlahng pohn dohlen Epraim, ‘Nna, kumwail kohdo! Kitail patohdalahng Saion, rehn KAUN-O, atail Koht.”
7. KAUN-O ketin mahsanih, “Kumwail pereperen kokoulki Israel, wehi me keieu lapalap nanpwungen wehi kan koaros. Kumwail koulki amwail koulen kaping; ‘KAUN-O ketin doarelahr sapwellime kan, e ketin kapitalahr koaros me luhwehdi.’
8. I pahn kahreiraildo sang ni paliepeng, oh kapokoneirailpene sang ni imwin sampah. Me maskun oh me nehtuk kan pil pahn iang irail kohdo, pil me liseian kan oh me pahn nektehn neitik kan. Re pahn kohpene wia wehi lapalap ehu.
9. Nei aramas akan pahn pwurodo wie sengiseng, wie kapakap ni ei kasapahliraildo. I pahn kahluwairaildohng ni piletik kan, nanial patapat me sohte emen pahn dipekelekel ie. Pwe I rasehng sahm emen ong Israel, oh Epraim iei nei mesenih.”
10. KAUN-O ahpw mahsanih, “Kumwail tohn wehi kan, kumwail rong ie, oh lohkihong deke doh kan ei mahsen kan. Ngehi me kasarepeseng mehn Israel kan, oh I pil pahn kapokoneirailpene, oh sinsile irail duwehte silepen sihpw men eh kin sinsile nah pelin sihpw.
11. Ngehi me kamaiauadahr mehn Israel ko, oh kapitirailla sang wehi kehlail ehu.
12. Re pahn kohdo oh koulki ar peren pohn Nahna Saion, re pahn pereperenki ei kisakis kan, ei werentuhke kan, ei wain, ei lehn olip, kisakis en sihpw oh kou kan. Re pahn rasehng mwetuwel me kin kelemwur mwahu; re pahn ahneki soahng koaros me re anahne.
13. Ahnsowo peinakapw kan pahn perenda oh kahkahlek, ohl mah kan, oh pil mwahnakapw akan, pahn ngisingiski ar peren. I pahn kansenamwahwihirailla oh kawekala ar nsensuwed ong ni nsenamwahu, ar pahtou ong ni peren.
14. I pahn kamedkihla samworo kan kisin tungoal me keieu mwahu, oh kaitarala anahn en nei aramas akan koaros. Ngehi, KAUN-O, me mahmahsen.”
15. KAUN-O ahpw mahsanih, “Ngihl ehu peipeido sang Rama, ngilen mwahiei. Resel me mwahmwahieiki nah seri kan; e sohte men nsenamwahula, pwehki nah seri kan sohralahr.
16. Kumwail tokedihsang amwail sengiseng, oh limwiasang pilen masamwail kan. I pahn katingih kumwail pwehki mehkoaros me kumwail wiahiong noumwail seri kan; re pahn pwurodo sang nan sapwen arail imwintihti kan.
17. Mie amwail koapworopwor ong ahnsou kohkohdo; noumwail seri kan pahn pwurodohng nan ar wasa. Ngehi, KAUN-O, me mahmahsen.
18. I kin rong mehn Israel ar ndinda nan ar nsensuwed, ‘Maing KAUN, se rasehng mahn lawalo, komwi ahpw ketin padahkihong kiht duwen at pahn peikiong komwi. Komw ketin kapwureikitewei; se ahpw pahn pwurowei, komwi me KAUN-O, at Koht.
19. Se patohwan sohpeisangkomwiher, ahpw se men mwadang patohwan pwurowei rehmwi. Mwurin omwi ketin kalokeikitehr, se itiengkihdi at nsensuwed. Se nameneklahr oh sarohdi pwehki dipat akan ni at pwulopwul.’
20. “Israel, kowe me nei seri keieu kesempwal, seri me I keieu poakohng. Ahnsou koaros me I kin tamanda edomw, I kin loaleidkin uhk mehlel. Kupwurei kin mwekimwekidkin uhk; I pahn kin kupwurkalahngan ong uhk.
21. Padokada kilel kan oh kilelehdi ahlo; pwurehng rapahki ahl me ke kekeidwei ie. Kumwail mehn Israel kan, kumwail pwurodo, kumwail pwurodohng nan amwail kahnimw kan.
22. Kumwail nei aramas soaloalopwoat kan, ia erein amwail pahn peikasal? I kapikadahr mehkot kapw oh ehu soahng; me duwehte lih emen doandoare ohl emen.”
23. KAUN-O, Wasa Lapalahpie, Koht en Israel, ahpw mahsanih, “Ni ei pahn onehda sapahl mehn Israel kan nan sapwarail, re pahn pwurehng wia kaping wet nan wehin Suda oh nan kahnimw kan, ndinda, ‘KAUN-O en kupwuramwahwih dohl sarawien Serusalem, wasa sarawi me e kin ketiket ie.’
24. Aramas akan pahn kousoanla nan Suda oh nan kahnimw kan koaros en Suda; ekei pahn wie sapwasapw, a ekei silepen mahn akan.
25. I pahn kakehlakahda me pwangadahr kan, oh kemmedala koaros me luwetkihla ar duhpek.
26. Aramas akan ahpw pahn nda, ‘I meirla oh pirida kehlail.’
27. “Ngehi, KAUN-O mahsanih: ahnsou ehu kohkohdo me I pahn kadirehkihla wehin Israel oh Suda aramas akan oh mahn akan.
28. Oh duwen ei wusirailda, sikeniraildi, keseirailla, oh kamwomwirailla ni keneinei, iei duwen ei pahn padokiraildi oh kauirailda ni keneinei.
29. Ni ahnsowo eh pahn leledo, aramas akan solahr pahn nda, ‘Sahm oh ihn akan kangalahr kreip karer, ahpw neirail seri kan me karerkihda.’
30. Ahpw mehmen me pahn kangada wahn kreip karer, pein ngih me pahn rerkihda; oh emenemen pahn mehkihla pein dipe.”
31. KAUN-O ahpw mahsanih, “Ahnsou ehu pahn kohdo me I pahn wiahda inou kapw ehu ong mehn Israel oh Suda.
32. E sohte pahn duwehte inou en mahso me I wiahiongehr ar pahpa kahlap ako ni ei kol pehrail kan oh kahluwairaildo sang Isip. Likamwete ei pwoud irail, ahpw re sohte loalopwoatohng inowo.
33. Inou kapw me I pahn wiahiong mehn Israel pahn duwe met: I pahn kihdi ei kosonned nan kapehdirail kan oh ntingihediong nan mohngiongirail kan. I pahn wiahla ar Koht, oh re pahn wiahla nei aramas.
34. Sohte emen rehrail pahn anahne padahkihong tohn eh wehi men en ese KAUN-O, pwehki koaros pahn ese ie, sang me tikitik lel me lapalap. I pahn mahkikihong diparail kan oh I solahr pahn tamanda arail sapwung kan. Ngehi, KAUN-O, me mahmahsen.”
35. KAUN-O kin ketikihong kitail ketipin pwe en kamarainih rahn, maram oh usu kan pwe en dakedaker nipwong. E kin ketin kamwakidada madau, pwe en ngiringirisek; mware, iei KAUN-O, Wasa Lapalahpie.
36. E ketin inoukihda me wehin Israel pahn mihmihte kohkohlahte. erein sapwellime koasoandi pwukat eh pahn duweduwehte.
37. Ma mehmen pahn kak sohngdi pahnlahng, oh kadierekda dahme mi pahn poahsoan en sampah, eri, ih ahnsou me KAUN-O pahn ketin soikala mehn Israel kan pwehki mehkan koaros me re wiadahr. KAUN-O, me mahmahsen.
38. KAUN-O ketin mahsanih, “Ahnsou ehu pahn kohdo me Serusalem unsek pahn kokouda sapahl pwehn wiahla ei kahnimw, sang ni Imwen Doulik Ananel ni palikapi lel ewen kehl me adaneki Ewen Kelen Keimw.
39. Eri, pehs me pahn wia irepen kahnimwo pahn kohla sang wasao kolahng palikapi ong dohlen Karep, oh e pahn kapil Koha.
40. Wahwo unsek, wasa me kahlep oh kidi kan kin lekdekla ie, oh sahpw koaros pohnangin kisin piletik Kidron lellahng ni Ewen Kelen Oahs ni palimese, e pahn kasarawihong ie. Kahnimwo eri solahr pahn pwurehng kamweremwerdi de kamwomwmwomwla.”

  Jeremiah (31/52)