←  Psalms (89/150)  →
1. TOUPA chitna thute tuh khantawnin lain ka sa dinga: ka kamin na ginomdan suan tengteng tanin ka theisak ding.
2. Chitna tuh khantawn adingin leptouhin a om dinga; na ginomna tuh vante ah ngei na hihkip ding, ka chita ahi.
3. Ka mitel kiangah thu ka khunga, ka sikha David kiangah ka kichiamta a;
4. Na suante khantawn adingin ka hihkip dinga, na laltutphah leng suan tengteng taninka lemtou ding, chiin. Selah.
5. TOUPA aw, vanten na thillamdang hih a phat ding uh; mi siangthoute kikhopna ah na ginomna leng a phat ding uhi.
6. Tung vandumte ah TOUPA toh kiteh thei ding kua a oma? Mi thilhihhhteitak tate laka TOUPA bang.
7. Mi siangthoute kihou khawmna ah Pathian kihtakhuai tak, a kim khawnga mi tengteng sanga kihtakpen ding, kua ahia?
8. TOUPA sepaihte Pathian aw, A aw, nang banga mi hat kua a oma? Na ginomna na kimah a om ngala.
9. Nang tuipi kisaktheihna vai na hawma: a tuikihawt kisep laite uh na hihdai hi.
10. Nang Rahab gal thah bangin na hihkham dimdema; nangmah galte tuh na ban tha hatin na keksakta hi.
11. Vante nangmaha ahi a, lei leng nangmaha ahi: khovel leh a sunga omteng nangmah muhkhiak ahi.
12. Sim leh mal nangmah siam ahia: Tabor leh Hermon na min jiak in a nuam hi.
13. Nang ban thilhihtheitak na neia: na khut a hata, na khut taklam tuh pahtawiin a om hi.
14. Diktatna leh vaihawmna dik tuh na laltutphah kingakna ahi a: chitna leh thutak tuh n amaah a pai hi.
15. Husa kipahhuai ja, namten nuam a sa ua: TOUPA aw, amau tuh na mel vakah a vak uhi.
16. Na min jiakin nitumin a nuam ua, diktatna jiakin pahtawiin a om uhi.
17. Nang ahatna uh thupina na ahi ngala: na deihsakna jiakin ka ki uh pahtawiin a om ding.
18. Ka phaw uh TOUPA a ahi ngala: ka kumpipa uh Israelte Mi Siangthou ahi.
19. Huai laiin na mi siangthoute kiangah kilaknain thu na gena, mi hattak khat tungah panpihna ka ngaa; mi khat mite laka tel khiak ka pahtawita hi, chiin.
20. Ka sikha David tuh ka mukheta a; ka thau siangthouin amah ka nilhtaa:
21. Ka khut a kiangah hihkipin a om dinga; ka banin amah a hihhat dinga; ka banin amah a hihat ding hi.
22. Melmain a lakah a phut kei ding; thulimlouhna tain leng a hihgim kei ding hi.
23. Amah galte a maah ka sat puk dinga, amah hote ka bawl ek ding.
24. Amah kiangah bel ka ginomna leh ka chitna a om ding hi; ka min jiakin a ki tuh pahtawiin a om ding hi.
25. A khut tuh tuipi-ah ka nga sak dinga, a khut taklam tuh luipite ah.
26. Aman, Nang ka Pa, ka Pathian, ka kihotdamna suangpi na hi, chiin, honsam ding.
27. Huan, ken amah tuh ta masain ka siam dinga, leia kumpipate lakah tungnungpenin ka bawl ding hi.
28. Ka chitna tuh khantawnin amah adingin ka kep hoih sak dinga, ka thukhun tuh a kiangah a om kip ding hi.
29. A chi suante tuh khantawnin ka omsak dinga, a laltutphah van om lai siahin ka omsak ding hi.
30. A taten ka dan a lehngatsan ua, ka vaihawmnate banga a om louh ua.
31. Ka thuseh a tatlekna a neih ua, ka thupiakte a kep hoih kei uleh.
32. A tatleknate uh chiangin ka hongkan dinga, a thulimlouhnate uh jepin ka hongkan ding hi.
33. Himahleh, ka chitna tuin a kiang akipan ka laksak vek kei dinga, ka ginomna tuh juau a suak din leng ka phal sam kei ding.
34. Ka thukhun ka suse kei dinga, ka muka thupawt leng ka hihlamdang sam kei ding hi.
35. Khatvei ka siangthouna louin ka kichiama, David kiangah juau ka gen kei ding;
36. A chi suante tuh khantawnin a om ding ua, a laltutphah ka maah ni bangin a om ding hi.
37. Kha bangin khantawn adingin hihkipin a om dinga, van duma theihpih ginom bangin, a chi a, Selah.
38. Himahleh nang na khahkhiain na deih keia, na thau nilhpa tungah na hehta ahi,
39. Na sikha thukhun tuh na kiha: a lallukhu leia pai khe hialin na hihniamta hi.
40. A huang tengteng na hihpuka; a kulh pite na hihse ta hi.
41. Lampi a pai peuhmahin a thil a laksak jel uh.
42. Amah doute khut taklam tuh na pahtawia; a melma tengteng na hihnuamsata hi,
43. Ahi, a namsau ma tuh na beng peka, amah tuh kisualna ah na ding kip sakta kei hi.
44. A vakna tuh na hihtawp saka, a laltutphah leiah na pai kheta hi.
45. A tangvallai nite uh na hihtom saka; amah tuh zahlaknain na khuhta ngala. Selah.
46. TOUPA aw, bangtan ahia na buk nilouh ding? Bangtan ahia na hehna tuh mei banga a kuan ding?
47. Aw, ka hun a tom dingdan theigige inla; mihing tate tengteng siam gina kei natel chia!
48. Kua mi ahia sih ni mel mulou ahinga, Sheol khut akipana a hinna humbit ding? Selah.
49. TOUPA, nidanglaia na hehpihna, na ginomna David kianga kichiama na chiam, koia om a hita a?
50. TOUPA, na sikhate a gensiatnauh theigige in; nam hat takte tengteng gensiatna ka angsunga ka thuak jeldan.
51. TOUPA aw, nang hondoute gensiatna, na thaunilhpa khapte gensiatna mah,TOUPA tuh khantawnin phatin om hen. Amen, Amen.
52. TOUPA tuh khantawnin phatin om hen. Amen, Amen.
←  Psalms (89/150)  →