←  Psalms (78/150)  →
1. Ka mite aw, ka dan thu-ah bil nadoh unla: ka kama thute ah na bil uh hondoh un.
2. Gentehna thuin ka kamka dinga: nidanglaia thugil gente ka gen khe ding:
3. Huaite i bil un i ja ua, i lungsimin leng I thei uhi, a piputen leng a honhilh uhi.
4. Huaite tuh a tate uh lakah i im kei ding ua, khangthak hongom ding kiangah TOUPA phatna thu leh, a hatdan leh a thillamdang pipi hih dante I hilh zo ding uhi.
5. Jakobte laka thutheihsak tuh a hihkipa, Israelte lakah dan a sepa, huaite tuh i pipute kiangah thupiakin a piaa, amau huai thu tuh a tate u kianga a theihsak ding un:
6. Khangthak hongom ding naupang hongpiang dingten, a theihtheihna ding uh, huaite tuh a thou ua, a thou ua, a tate u kianga a hilh sawn jel ding un:
7. A lametna uh Pathiana a a koih theih ua, Pathian thilhihte a mangngilh louhna ding ua, a thupiakte a zon jawkna ding un:
8. Leh, a pipute bang ua, suan genhak tak leh helhat suan lungtang bawl diklou, Pathian laka lungsim ginomlou pua a om louhna ding un.
9. Ephraim suante galthuama kithuama, thalpeu tawiin, kisual niin a taikek ua:
10. Pathian thukhun a jui kei ua, a dana om leng a ut kei ua:
11. A thilhihte a mangngilh ua, a thil lamdang hih a muhsakte toh.
12. A pipute uh mitmuhah thillamdang pipite ahih jela. Aigupta gamah Zoan pawnah.
13. Tuipi a khen hoka, amau a galkaisaka: tuite tuh bangkhat koih khawm venvon bangin a khawlsak meuhmouh hi.
14. Sun chiangin meiin a pi a, jan khuain mei vakin leng a pipi hi.
15. Gamdai ah suangpite a kitam saka, tui thukpi akipan bang maiin dawnding tampi a pia hi.
16. Suangpi akipanin luite a pawt khe saka, tuite luipi bangin a luang khe sak hi.
17. Huchi pipiin leng a tungah thil a hihkhial lailai ua, gam keu ah Tungnungpen tungah a hel uhi.
18. A gongthak uh hihdamna dinga anek ding uh ngenin a lungtang un Pathian a zeet uhi.
19. Ahi, Pathian kalhin thu a gen ua; Gamdai ah Pathianin dohkan a bawlkhol thei diam maw?
20. Ngaiin, suangpi a sat a, tuite khawng a hongkikhoh khiaa, luite tuh a piau ah a dimleta; an leng a pe thei nalai diam maw? A mite adingin sa a bawlkhol diam maw? A chi ua.
21. Huchiin TOUPAN a na jaa, a hehta a: Jakobte tungah mei a hongkuang kheta a, Israelte tungah hehna hongsuakta hi;
22. Pathian a gingta kei ua, a hotdamna leng a muan louh jiak un.
23. Himahleh tunglam van dumte thu a pia a, van kongkhakte a honsaka:
24. A nek ding un manna a tunguah a zu saka, van buh tuh a kiang uah a pia hi.
25. Mihingten angel ann a ne ua: vahna khopin ann a honpia a.
26. Suahlam huih van ah a nungsaka: a thilhihtheihnain sim huih a nung sak hi.
27. Sa tuh leivui zah khawng tak a tunguah a zusaka, vasa kha nei tuipi-a piaunel zah tak:
28. A giahna mun tak uah a ke saka, a omna buk kim khawng uah.
29. Huchiin a ne ua, a vah ngial ua; a lunggulh uh a kiang uah a pia hi.
30. A gongthakna uh a dai naikei a, a an uh a kam uah a om laia,
31. Huchih laitakin Pathian hehna tuh a tunguah a tunga, a mi hoihhoihte uh khenkhat a thata, Israel tangvalte a sat puk helhhulh hi.
32. Huchi piin leng thil a hihkhial lailai ua, thillamdang hihte a gingta tuan kei uh,
33. Huaijiakin a damsung nite uh bangmahlou phetin a hihmangsaka, a damsung kumte uh launain a hihmansak lai hi.
34. Amaute a thah chiangin amah a zong ua: a kik nawn ua, jingsangpiin Pathian a zonguhi.
35. Pathian tuh a suangpi uh ahi chih leh Pathian Tungnungpen a tanpa uh ahi chih a thei khe jel uhi.
36. Himahleh amah a kam un achiamnuih phat ua, a lei un a kiangah juauthu a gen uhi.
37. A lungtang uh amah lakah a dik ngal keia, a thukhun ah lah a ginom sam kei uh.
38. Himahleh, amah bel lainatnaa dim a hih jiakin a thulimlouhna uh a ngaidama, amau a hihmang kei hi. ahi, tamvei pi a hehna a la kika. a thangpaihna a vekin a tokthou nuam kei jel hi.
39. Sa leltak a hih uh a theigige a: huih, kik nawnlou dinga nung mang jel bangin.
40. Gamdai ah a tungah hel munin, gam keu ah amah hihlungkham mun hina tel u e!
41. A kihei kik nawn un Pathian a zeet ua, Israelte mi siangthou a hihvui naknak uhi.
42. A khut a theigige kei ua, melma laka a humbit ni a theigige sam kei uhi.
43. Huchi-a Aigupta gama achiamtehnate a koiha, Zoan pawnah a thillamdang hihte leng a koiha;
44. A luipi uh sisan a suaksaka, a luite uh leng sisan a suaksak hi, huchiin a dawn theita kei uhi.
45. A lak uah thou tampi a sawla, huaiin amau a ne khina; ukengte leng a sawla, huaiin amau a hihmangta hi.
46. A thil poute u leng lung kiangah a piaa, a sepgim gah uh khaupe kiangah a pia hi.
47. A grep guite uh gialin a hihsia a. a theipi kungte u leng vukin a hihsia hi.
48. A ganta u leng gial kiangah a pia a, a ganhonte uh kek sa velvol kiangah a pia hi.
49. A hehna thupi tak a tunguah a khia a, thangpaihna te, lunghihlouhna mahmahte, mangbatna te, gilou angel honte,
50. A hehna adingin lam a bawlsaka’a hinna uh sihna lakah a humbit keia, a hinna uh hi kiangah a pezota hi.
51. Aigupta gama ta chil om tengteng a hihluma, Ham puanintea a hatna gah masa pente uh.
52. Himahleh amah mite tuh belam bangin a pi khia a, ganhon bangin gamdai ah a pi hi.
53. Bit takin a pi a, huchiin bangmah a lau kei ua: himahleh tuipiin a melmate uh a khuh khinta hi.
54. Huan, a mun siangthou gamgi a pi tunga, hiai tang, a khut taklama a lei.
55. Nam chih a ma uah a delh khia a, amau khaua tehin gouluah dingin a hawma, a puaninte uah Israel namte a omsakta ahi.
56. Himahleh, Pathian Tungnungpen tuh a zeet ua, a tungah a hel ua, a thutheihsakte lah a jui ngal kei uhi.
57. Kihei nawnin, a pipute u bangin lepchiah takin a gamta zota uhi: thalpeu muanhuai lou bangin a pai kawi uhi.
58. A mun sangte un amah tuh a hihheh ngala, a milim siamte un a mullit sak ahi.
59. Pathianin huai a najakin a heha, Israelte a kih mahmah hi.
60. Huchiin Shiloh biakbuk mihing laka apuanin koih, a paisan a:
61. A hatna salah a mansaka, a thupina melma khut ah a mansak nawn hi.
62. A mite namsau kiangah a piaa; a gouluah ding tungah a hehta hi.
63. Meiin a tangvalte uh a kangmanga, a nungakte un kitenna himhim a neita kei uhi.
64. A siampute uh namsaua hihpukin a om ua; a meithaite uh a kap himhim kei uhi.
65. Huchih laiin, TOUPA, mi ihmu a khanglou bangin a khangloutaa, mi hat uain jiaka kikou bangin.
66. Amah melmate tuh a sat kika, khantawn min siatna a lohsakta hi.
67. Huailou leng Jospeh puanin a deih keia, Ephraim nam leng a telta kei hi;
68. Juda nam tuh a tel zota a, a it Zion tang mah.
69. A in siangthou tuh van sangte bangin a lama, khantawn dinga a hihkip leilung bangin.
70. A sikha David tuh a tela, belam huang akipante a la khiaa:
71. Belampu nou kaite zuihna akipanin a pi khiaa, a mite Jakobte leh a gouluah ding Israelte vak dingin.Huchiin aman a lungtang uh hoihna bangjelin amaute a vaka; khut siamin a pita hi.
72. Huchiin aman a lungtang uh hoihna bangjelin amaute a vaka; khut siamin a pita hi.
←  Psalms (78/150)  →