←  Psalms (38/150)  →
1. Toupa aw, hehin hontai kenla; thangpaiin honsawi sam ken.
2. Na thalte tuh ka sa ah a tala, na khut tuh ka tungah a tu bukbuk ngala.
3. Na lunghihlouhna jiakin ka sa ah damlai himhim a om kei hi; ka thulimlouhna jiakin ka guhte ah damlai himhim a om sam kei hi.
4. Ka thulimlouhnaten ka lu a tum manga, puakgik tak bang, ka puak zoh vuallouh ahi.
5. Ka haina jiakin ka chikehte a uihin a se khinta hi.
6. Ka chi a na a, ka kun ngiungiaua; nitumin lungkham in ka mau ka mau hi.
7. Ka kawng a lum huthut veka; ka sa ah leng damlai himhim a om kei hi.
8. Ka baha, ka sidup keihkuiha; ka lungtang noplouhna jikain ka thum hithit hi.
9. Toupa ka deihlam tengteng na theia; ka thumna leng na lakah sel ahi kei hi.
10. Ka lung a phu dupdupa, hatna ka neita kei; ka mit vakna nasanin hon omlouh santa hi.
11. Hon itte leh ka lawmte ka natna lakah a kihuikhe jel ua; ka sanggamte leng gamla pi ah a ding uhi.
12. Ka hinna hihmang tuma zongten honmatna ding un thang a kam ua; ka siatna ding zongten leng thu hoihlou takte a gen nak uhi; nitumin khemna thute a ngaihtuah uhi.
13. Himahleh kei tuh bengngong bangin za louin ka om a; pau theilou mi kamka ngeilou bangin ka om hi.
14. A hi, mi pau za theilou, a kama taihilhna mawngmawng pawt ngeilou bang in ka om hi.
15. Toupa aw, nangmah kon lamen ngala; Toupa ka Pathian aw, nang non dawng hi.
16. Huchilou in jaw hon otsan dia, ka khe a teu takin ka tungah a kihihlian kha ding uh, ka chi ahi.
17. Ka puk dekdek ngala, ka lungngaihna leng ka maah a om gige hi.
18. Ka thulimlouhna tuh ka pulak dinga; ka khelhna jiaka lungngaiin ka om ding ahi.
19. Himahleh hondoute a halh ua, a hat uhi: diklou pi a hon hote kilawmlou piin a pung ua.
20. Thilhoih thil gilou a thuk nakte tuh thilhoih ka delh jiak in hondoute ahi uhi.
21. Toupa aw, honpai san mahmah kenla; ka Pathian aw, hon gamlat mahmah ken.Toupa hondampa aw, hon panpih ding in, kin meng in.
22. Toupa hondampa aw, hon panpih ding in, kin meng in.
←  Psalms (38/150)  →