| ← Psalms (22/150) → |
| 1. | Ka Pathian, ka Pathian, bangachia honpaisan? Bangachia honpanpih dinga na gamlat mahmaha, ka thumna thute akipana na gamlat? |
| 2. | Ka Pathian aw, sunin ka kikou-a, himahleh na dawng tuan keia; janin leng ka kikou-a, ka dai tuan kei hi. |
| 3. | Himahleh, nang Israelte phatnaa tengpa aw, nang jaw na siangthou hi. |
| 4. | Ka pipute uh nang honna muang ua: a muang ua, huchiin nang na humbit jel hi. |
| 5. | Nang honsam ua, huchiin, humbitin a om jel ua: honmuang ua, huchiin zahlakin a om ngeikei uhi. |
| 6. | Kei jaw mihing himhim ka hi keia, tangtel phet ka hi a; mihingte gensiat leh mite muhsit ka hi. |
| 7. | A honmu peuhin honnuihsan ua, a muk uh a lawksak ua, a lu uh a sing uh; |
| 8. | TOUPA muang hi ven, aman amah humbit leh ake: a tunga a kipah jiakin humbit leh ake, a chi ua. |
| 9. | Nang tuh sul akipana honlakhepa na hi a: ka nu nawi tunga ka om laiin nang non gingta sakta hi. |
| 10. | Sul akipan himin nangmah tungah ngak ka nahi a: nang tuh ka nu gilsung himah ka Pathian na hi hi. |
| 11. | Hon gamlat mahmah ken; mangbatna ding anai ngala; panpihpa ding himhim a om tuan kei hi. |
| 12. | Bawngtal tampiin honum suak ua: Basan gama bawngtal hat takten hon um suak dedup uhi; |
| 13. | Humpineilkai duhgawl humham hat bangin a kam un honkamkat khum uhi. |
| 14. | Tui banga buak khiakin ka oma, ka guh tengteng leng a kilawi hi; ka lungtang tuh khuainun bang ahia, ka gil lakah a zul khinta hi; |
| 15. | Ka tha tuh belpei bangin a keu khina; ka lei leng ka dangtawngah a belh bikbeka; nang sihna leivuiah nonpi lutta hi. |
| 16. | Uiten a honum suak ngal ua: thil hoihlou hih omkhawmten hon um bit ua; ka khut leh ka khete a vut uhi. |
| 17. | Ka guh tengteng ka sim theia; amau lah honenin hon ensal ua; |
| 18. | Ka puansilhte a kihawm ua, ka puannak dingin ai a san uhi. |
| 19. | Nang bel, TOUPA aw, hon-gamlat mahmah ken! hon Hihhatpa aw, honpanpih dingin hongkin in! |
| 20. | Ka hinna tuh namsau lakah humbit inla; ka neih sun pentak tuh ui thilhihtheihna lakah humbit in! |
| 21. | Humpinelkai kam akipanin hon hondam inla; ahi, gam bawngtal ki akipanin ka kha hondam in! |
| 22. | Ka uanaute kiangah na min ka hilh dinga: kikhawmte lakah ka honphat ding hi; |
| 23. | TOUPA laudansiamte aw, amah phat un! Jakob suan teng teng aw, amah pahtawi un: Israel suan tengteng aw, amah kihta un: |
| 24. | Aman gimthuakmi gimdan a musit ngal keia, a kih sam kei hi; a mai lah a lakah a sel kei hi; amah a sapin a ngaikhe jaw hi. |
| 25. | Kikhopna thupitaka ka honphat jelna jaw nang maha ahi: amah laudan siamte maah ka thuchiam ka tangtun ding hi. |
| 26. | Thunuailutten a ne ding ua, a tai ding uh: amah zongten TOUPA a phat ding uh: na lungtang uh khantawnin hingin om hen! |
| 27. | Kawlmong mi tengteng in leng a thei nawn ding ua, TOUPA lam a ngata ding uh: nam chiha chi chih na maah a kun ding uhi. |
| 28. | Gam tuh TOUPAA ahi a, nam chih tunga vaihawmpa ahi ngala. |
| 29. | Leia mi neizou tengtengten a ne un chibai a buk ding ua; leivui dia paisuak ding tengteng tuh a maah a hongkun ding uh, amau hinna hingsak gige theiloute. |
| 30. | Chi suanin amah nek leh tak a a bawl dinga; khangthak hongom nawnte kiangah TOUPA tanchin a hilh ding ua;A hongpai ding ua, nam hongpawt ding kiangah, A hihkhinta, chiin, a diktatdan a hontheisak ding uh. |
| 31. | A hongpai ding ua, nam hongpawt ding kiangah, A hihkhinta, chiin, a diktatdan a hontheisak ding uh. |
| ← Psalms (22/150) → |