| ← Psalms (106/150) → |
| 1. | TOUPA tuh phat un, Aw, TOUPA kiangah kipahthu hilh un; amah lah a hoih ngala: a chitna leng khantawna om ding ahi ngala. |
| 2. | Kua ahia TOUPA thilhih thupitakte gen theia a phatna tengteng theisak vek thei? |
| 3. | Vaihawmna kem hoihten nuam a sa uhi, chiklai peuha leng diktat taka hihmi toh. |
| 4. | TOUPA aw, na mite na deihsaknain hontheigige inla, aw, na hotdamna toh hongvehin; |
| 5. | Na mi telte hamphatna ka muhtheiha, na namte kipahna ah ka nopsak theiha, na gouluahte toh ka suan theihna dingin. |
| 6. | Ka pipute utoh thil ka na hihkhial ua, thilgilou ka hih ua, gilou takinka hihta uhi. |
| 7. | Ka pipute un Aigupta gama na thillamdang hihte a theisiam kei ua; na chitna thupitak a theigige ta kei ua; tuipi ah a hel zota ua, Tuipi San ah. |
| 8. | Huchi pipiin leng a mah minjiakin amau a hondamtaa, a thilhihtheihna thupitak a theihsakna dingin. |
| 9. | Tuipi San a taia, huchiin a kangta a; huan amau gamdaia pi paisuak bangin tui thukte ah a pi paisuakta hi. |
| 10. | Amau homi khut akipan a hondama, melma khut akipan a tanta hi. |
| 11. | Tuiten amau doute a khuh khina, khat leng dama pawt a om ta kei uhi. |
| 12. | Huai laiin a thute a gingta ua; a phatna la a sa uhi. |
| 13. | Himahleh a thilhihte tuh a mangngilh zok ua; a lunggelna tuh a ngak ngamta kei uhi; |
| 14. | Gamdai ah thil a lungulh mahmah ua, gam keu ah Pathian a zeetta uhi. |
| 15. | A thil nget uh a pia a; himahleh a hinna uah gawnna a lutsakta hi. |
| 16. | A giah mun uah Mosi a hazata ua, TOUPA mi siangthou Aron toh. |
| 17. | Lei tuh a kamkaa, Dathan a valhta, Abiram pawlte tuh a khuh khinvek hi. |
| 18. | A pawl lak uah mei hihkuanin a hongoma, meikuang ah mi gilousaloute a kangmangta uhi. |
| 19. | Horeb tang ah bawngnou lim a siam ua, a lim sun tuh a beta uhi. |
| 20. | Huchibangin a thupina uh bawngtal loupa ne bangphet a suaksakta uhi. |
| 21. | Pathian a hondampa uh a mangngilhta ua, Aigupta gama thil thupi taktak. |
| 22. | Ham gama thillamdangte, Tuipi San dung athil mulkimhuaite hihte. |
| 23. | Huaijiakin, a hihmang kha dinga, chi-a, a hehna hihkik dingin a mi tel Mosi tuh a lutna dingah a maah na ding kei ngial le houh, a hihmang ding chih a gen hi. |
| 24. | A hi, gam deihhuai tak a ngaineu ua, a thu tuh a gingta nuam kei ua; |
| 25. | A puanin uahte khawng a phun zota ua, TOUPA aw tuh a ngaikhe nuam kei uhi. |
| 26. | Huaijiakin amau lamah a khut ajaka, amaute tuh gamdaia a hihpukna ding leh, |
| 27. | A chi suan dingte uh nam chih laka a hihpuka, gam china a hihjakna dingin. |
| 28. | Boal-peor lamah a velh ua, misi kianga thil latte tuh a ne samta uhi. |
| 29. | Huchibangin a thilhihte un amah a hihheh ua; huchiin a tunguah hi honlengta hi. |
| 30. | Huai laiin Phinehas a dinga, vai a hawma: huchiin hi tuh daihsakin a omta hi. |
| 31. | Huai tuh amah tunga diktatnaa seh ahi, khantawnin suan tengteng tanin. |
| 32. | Meribah tuite ah tekhawng leng amah a hihheh ua, huchiin amau jiakin Mosi tungah thilhoihlou a tung hialta hi. |
| 33. | A kha tungah a hel ua, a mukin kilawmlou pi thu a gen jiakin; |
| 34. | TOUPAN a kiang ua hihman thu a piak bangin mipite a hihmang kei ua. |
| 35. | Nam chih tuh a kihelpih ua, a thilhihte uh tuh a ching jaw ua; |
| 36. | A milim nate khawng uh a sem ua; huaite tuh amau adingin thang a honghita: |
| 37. | A hi, dawi kiangah tekhawng a tapate a tanute un a kithoih ua. |
| 38. | Sisan gensiatbei, a tapate uleh a tanute u sisan ngei a suahta ua, huaitein Kanaan gam milimte kiangah a kithoih uhi; huai gam tuh sisanin a na ninta hi. |
| 39. | Huchibangin a nasepte ua hihbuahin a om ua, a thilhihte un ang a kawmta uhi. |
| 40. | Huaijiakin TOUPA a mit tungah a thangpaitaa, a gouluah tuh a kih hi. |
| 41. | Huchiin amau tuh nam chihkhut ah a paia; amau hoten a tunguah vai a hawmta uhi. |
| 42. | Amau douten a nuaisiah ua, a khut nuai uah hihneuin a omta uhi. |
| 43. | Tamveipi amau a humbita; himahleh a lunggelna uah a hel nak uhi, a gitlou a satlouhna uah hihniamin aomta uhi. |
| 44. | Huchi pipiin leng aman, a kikou husa uh a jain, a mangbat uh a limsak ahi. |
| 45. | A thukhun tuh amau a theisak gigea a chitna thupidan bang jelin alungsim a kisikta hi. |
| 46. | Sala pite tengteng tuh amau a hehpihsak hi. |
| 47. | TOUPA ka Pathian u-aw, honhondam inla, nam chih laka kipan honpikhawmin, na min siangthou phat ding leh na phatna suang dingin.TOUPA, Israelte Pathian, phatin om heh, khantawn akipan khantawn phain leng. Mi tengtengin, Amen, chi uhen, TOUPA tuh phat un. |
| 48. | TOUPA, Israelte Pathian, phatin om heh, khantawn akipan khantawn phain leng. Mi tengtengin, Amen, chi uhen, TOUPA tuh phat un. |
| ← Psalms (106/150) → |