| ← Psalms (105/150) → |
| 1. | Aw, TOUPA kiangah kipahthu gen unla, amin lou un; mi chih lakah a thilhihte theisak un. |
| 2. | Amah pahtawiin lasa unla, amah phatin lasa un; a thillamdang hih tengteng thuin houlim un. |
| 3. | A min siangthou tuh suang un: TOUPA zongte lungtang nuamsa hen. |
| 4. | TOUPA leh a hatna zong unla: a mel zong gige un. |
| 5. | A hihzohsa a nasep lamdangte, a thillamdangte, leh a kama vaihawmnate tuh theigige un; |
| 6. | A sikha Abraham suante aw, a telte Jakob tate aw. |
| 7. | Amah tuh TOUPA i Pathian ahi a; a vaihawmte leitung tengtengah a om hi. |
| 8. | A thukhun khantawnin a thei naknak, suan sang khat tana a thu na piak ngei; |
| 9. | Abraham kianga a thukhun leh, Isaak kianga a kichiamna ngei; |
| 10. | Huaimah tuh thuseh adingin Jakob kiangah a hihkipa, Israel kiang khantawn thukhun dingin. |
| 11. | Kanaan gam na kiangah ka honpe dinga, na gou tantuam ding chiin. |
| 12. | Mi tawmchik phet a hihlai un; ahi, tawmchik phet, huai gamah mikhual ahi ngal ua; |
| 13. | Nam tuamtuam kiangah a pai vialvial ua, gam tuamtuam akipanin mi tuamtuamte kiangah. |
| 14. | Kuamah nuaisiah a phal keia: ahi, amau jiakin kumpipate leng a taihilha: |
| 15. | Ka thaunilhte khoih kei unla, ka jawlneite himhim leng hihna kei un, chiin. |
| 16. | Huai gama ke dingin kial a sam a; nek ding himhim a omsakta kei hi. |
| 17. | A ma uah mi a sawla; Joseph sikha dinga juakin a oma: |
| 18. | A khete tuh kolin a hihna ua; sik khainiang bunin a omta a. |
| 19. | A thu a tun masiah, TOUPA thuin amah tuh a zeet ngitnget hi. |
| 20. | Kumpipan mi a sawl khiaa, a suta, a khahta a, mi chih vaihawmpa ngeiin. |
| 21. | A innsunga heutu ding leh, a sum tengteng tunga vaihawm dingin a bawla: |
| 22. | A mi liante a ututa hen ding leh; a upate hihpil dingin. |
| 23. | Israel leng Aigupta gamah a hoha; Jakob tuh Ham gamah a omta dih hi. |
| 24. | A mite tuh nakpi takin a pungsaka, amau doute sangin a hihhat zota hi. |
| 25. | A mite ho dingin a lungtang uh a lehngatsaka, a sikhate tunga lepchiah taka hih dingin. |
| 26. | A sikha Mosi a sawla, a mitel Aron toh. |
| 27. | Amau achiamnate a lak uah a ensak ua, Ham gamah thillamdangte a ensak uhi. |
| 28. | Aman mial a sawla, a hihmialta a; huchiin a thute tuh a nialta kei uhi. |
| 29. | A tuite uh sisan a suaksaka, a ngasate uh a hihlumta hi. |
| 30. | A gam uh ukengin a dimta a, a kumpipate uh dantan sungah nangawn leng. |
| 31. | Aman thu a gena, huchiin thou tampi hongpai ua, hik leng a gamsung tengteng uah a hongom uhi. |
| 32. | A kiang uah vuah sikin gial a pia a, a gam uah meikuang jualjual leng a peta hi. |
| 33. | A grep guite u leh a theipi kungte uh a hihsi a; a gam ua singte leng a kitansakta hi. |
| 34. | Aman thu a gena, huchiin khaupeta a hongpai ua, lungte toh, sim zoh vuallouhin. |
| 35. | Huaiten a gam ua haichi khempeuh a gai ua, a lei gahte uleng a gai uhi. |
| 36. | A gam ua ta masa om tengteng a thata, a hatna tengteng gah masapente uh. |
| 37. | Huchiin, dangka leh dangkaeng toh a pi kheta a; amah namte lakah mi hatlou khat leng a om kei hi. |
| 38. | A pawt lai un Aiguptate a kipak ua: amau tuh a lau tak jiak un. |
| 39. | Aman aliah dingin mei a kaisaka, jana tanvak dingin mei leng a pia hi. |
| 40. | A ngen ua, huchiin vamin a honpia a, van an-in amau a taisakta hi, |
| 41. | Suangpi a honga, huchiin tui a hongpawt juajua a, mun keute ah lui bangmaiin a luangta hi. |
| 42. | A thu siangthou a theigige ngala, a sikha Abraham toh. |
| 43. | Huchiin, a mite tuh nuamsa takin a pi kheta a, a mitelte tuh lasa kawmkawm jelin. |
| 44. | Huan, nam chih gamte a kiang uah a piaksaka: amau tuh mi chih sepkhiaksa a luahta uhi.A thusehte a zuih theihna ding un, a dante tuh a vom hoihna dingin, TOUPA phat un. |
| 45. | A thusehte a zuih theihna ding un, a dante tuh a vom hoihna dingin, TOUPA phat un. |
| ← Psalms (105/150) → |