| ← Proverbs (16/31) → |
| 1. | Lungtang kisakkholna mihinga ahi: himahleh lei dawnna TOUPA akipan ahi. |
| 2. | Mihing lampi tengteng amah mit ah a sianga: himahleh TOUPAN khate a buk jel hi. |
| 3. | TOUPA kiangah na nasepte kemsak inla, huan na ngaihtuahnate hihkipin a om ding hi. |
| 4. | TOUPAN thil chiteng a tawpna dingin a bawlta: ahi, gilou nangawn gilou ni adingin. |
| 5. | Mi chih lungtang kisathei TOUPA adingin kihhuai ahi; thei in, gawtlouhin a om kei ding. |
| 6. | Chitna leh thutakin thulimlouhna suksiang ahi: huan TOUPA kihtaknain mite hoihlou akipan apai mang uh. |
| 7. | Mihing lampiten TOUPA a suklungkim chiangin, a melmate nangawn amah toh kilem dingin a bawl hi. |
| 8. | Diktatna toh tawmchik a hoihjaw diklouhna toh summuhna thupi sangin. |
| 9. | Mihing lungtangin a lampi a ngaihtuaha: himahleh TOUPAN a kalsuante a bawlsak hi. |
| 10. | Kumpipa muk ah pathian thu a om: a kamin vaihawmnate ah a talek kei ding hi. |
| 11. | Bukna dik leh tehna dik TOUPAA ahi uh: ip gikna tengteng a nasep ahi. |
| 12. | Kumpipate adingin gilou hih kihhuai ahi: mangtutphah lah diktatnaa hihkip ahi ngala. |
| 13. | Muk diktatte kumpipate kipahna ahi; huan kuapeuh a dik a it uh. |
| 14. | Kumpipa thangpaihna sihna sawltakte bang ahi: himahleh mi pilin a hihlungdam ding hi. |
| 15. | Kumpipa mel vakna ah hinna a om; huan a deihsakna vuah nanung meipi bang ahi. |
| 16. | Pilna muh dangkaeng sangin nak hoihjawk hina e: ahi, theihsiamna muh dangka sanga tel jawk ding ahi. |
| 17. | Mi tang lamlian hoihlou akipana pai mang ahi: kuapeuh a lampi kemin a kha a hawi hi. |
| 18. | Kisaktheihna siatna maah a paia, huan lungsim kiuangsak pukna maah. |
| 19. | Gentheite toh lungsim niamkiaka om a hoihjaw, kisathei toh gallak hawm sangin. |
| 20. | Kuapeuh thu limsakin hoih a mu ding: huan kuapeuh TOUPA a muang, aman nuam a sa hi. |
| 21. | Lungtang pil pilvang a chi ding uh; huan muk khumna in sinsiamna a pungsak hi. |
| 22. | Theihsiamna huai neia dingin hinna luikhuk ahi: himahleh mi haite bawlhoihna a haina uh ahi. |
| 23. | Mi pil lungtangin a kam a hilha, huan a muk ah sinsiamna a behlap hi. |
| 24. | Thu kipahhuai khuaizu-khak bang ahi, khaa dia khum, guhte adia damna. |
| 25. | Mihing adia dika kilawm lampi a om, himahleh huai tawpna sihna lampite ahi. |
| 26. | Semgim mi gilkialnain amaha dingin a semgima: a kamin lah huai amah akipan a lunggulh ngala. |
| 27. | Mi thulimlouin siatna a ngaihtuah: huan a muk ah mei sa bang a om hi. |
| 28. | Mi kiuangsakin kinakna a theh jaka: huan huauhatmiin lawm bulte a khen jak hi. |
| 29. | Hiamgam min a inveng a khema, a hoihlou lam lampi ah a pi. |
| 30. | Kuapeuh a mit si, thil hoihloua ngaih ding ahi; kuapeuh a muk chihin hoihlou a hontunsak nak hi. |
| 31. | Lutang kang thupina manglukhu ahi, diktatna lampi ah muhin a om hi. |
| 32. | Kuapeuh hehhak mihat sangin a hoihjaw; huan kuapeuh a lungsim thuzoh khopi lasangin.Angsungah ai a kisana; himahleh huaia hihpaisuakna jaw TOUPA akipan ahi. |
| 33. | Angsungah ai a kisana; himahleh huaia hihpaisuakna jaw TOUPA akipan ahi. |
| ← Proverbs (16/31) → |