←  Genesis (11/50)  →

---

1.

Huan, leia mi tengteng pau khat leh thugen dan khat ahi ua.

2.

Huan, hichi ahia, suahlama a kisuan jel laiun Sinar gamah phaijang a mu ua; huaiah a tengta uhi.

3.

Huan, Kisa un; teklei I bawl dia, hoih takin I hal ding, a kichita uhi. Huchiin, suang sikin teklei a nei ua, suanghukna sikin, longnai a nei uhi.

4.

Huan, Kisa un, khopi i bawl dia, insang a vum van sun dingin I bawl dia, I min I thangsak ding uh; huchilouin jaw lei pumpiah hihdalhin I omkha ding, a chi uh.

5.

Huan, Toupa mite taten khopi leh insang a lam khawng uh en dingin a hoh suka.

6.

Huan, Toupan ngai dih ua, mipi te pumkhat ahi ua, a vek un lah pau khat a nei ngal ua; hiai thil a hih pan uhi; tun jaw a thilhih tup himhimte uh leng kham vual a hita kei ding.

7.

Kisa un, I va hoh suk ding, pau a kitheituah theihlouhna ding un, huailaiah a pau uh I vasuklamdangsak ding, a chi a.

8.

Huchiin, Toupan amaute huai akipanin lei tengteng ah a dalhsaka: huchiin a kho bawl uh a tawpsanta uhi.

9.

Huaijiakin a min Babel a chi uh; Toupan amaute leitung tengteng ah a dalhsakta hi.

10.

Hiai Sem suante ahi uh. Sem kum ja a upa ahi, tuichim tun nung kum nih nungin tapa Arpaksad a nei hi.

11.

Huan, Arpaksad a neih nungin Sem kum za nga a dam laia, tanu leh tapate a nei nawn lai hi.

12.

Huan, Arpaksadin, kum sawmthum leh kum nga a hihin, tapa Selah a neia:

13.

Huan, Selah a neih nungin Arpaksad kum zali leh kum thum a dam laia, tanu leh tapate a nei nawn lai hi.

14.

Huan, Selahin, kum sawm thum ahihin, tapa Eber a neia:

15.

Huan, Eber a neih nungin Selah kum zali leh kum thum a dam laia, tanu leh tapate a nei nawn lai hi.

16.

Huan, Eberin, kum sawm thum leh kum li a hihin, tapa Peleg a neia:

17.

Huan, Peleg a neih nungin Eber kum zali leh kum sawm thum a dam laia, tanu leh tapate a nei nawn lai hi.

18.

Huan, Pelegin, kum sawm thum ahihin, tapa Reu a neia:

19.

Huan, Reu a neih nungin Peleg kum zanih leh kum kua a dam laia, tanu leh tapate a nei nawn lai hi.

20.

Huan, Reuin, kum sawm thum leh kum nih a hihin, tapa Serug a neia:

21.

Huan, Serug a neih nungin Reu kum zanih leh kum sagih a dam laia, tanu leh tapate a nei nawn lai hi.

22.

Huan, Serugin, kum sawm thum ahihin, tapa Nahor a neia:

23.

Huan Nahor a neih nungin Serug kum zanih a dam laia, tanu leh tapate a nei nawn lai hi.

24.

Huan, Nahorin, kum sawm nih leh kum kua ahihin, tapa Terah a neia:

25.

Huan, Terah aneih nungin Nahor kum za leh kum sawm leh kum kua a dam laia, tanu leh tapate a nei nawn lai hi.

26.

Huan, Terahin, kum sawm sagih ahihin tapa Abram te, Nahor te, Haran te a nei hi.

27.

Huan, hiaite Terah suante ahi uh. Terahin tapa Abram te, Nahor te, Haran te a neia; huan, Haranin tapa Lota a nei.

28.

Huan, Haran a pianna gama, kaldaite khua Ur ah, apa Terah main a si hi.

29.

Huan, Abram leh Nahorin ji a nei ua; Abram ji min Sarai ahia: Nahor ji min Haran tanu Milka ahi, Haran Milka pa leh Iska pa ahi.

30.

Huan, Sarai a chiinga; ta himhim a neikei.

31.

Huan, Trahin tapa Abram te, a tapa tapa (Haran tapa) Lota te, a mou, a tapa Abram ji Sarai te a pia; huan, Kanana hoh dingin Kaldaite khua Ur akipanin a pawt khawmta uhi; huan, Haran khua a hongtun un, huailaiah a tengta uh.Huan, Terah damsung kum za nih leh kum nga ahi a: huan, Terah Haran khuaah a sita hi.

32.

Huan, Terah damsung kum za nih leh kum nga ahi a: huan, Terah Haran khuaah a sita hi.

---

←  Genesis (11/50)  →