2Samuel (10/24)  

1. Huan, hichi ahi a, huai nung in Amon suante kumpipa a si a, a tapa Hanun in a mun ah vai a hawm hi.
2. Huan, David in, A pan a honna hehpih bang in ken leng Nahas tapa Hanun ka hehpih sam ding, a chi a. Huchi in David in a pa tungtang thu a lungmuan ding in amah mite a sawl a. Huan, David mite Amon suante gam a va tung uh.
3. Himahleh Amon suante makaite'n a pu uh Hanun kiang ah, David in na pa a zah ziak a na kiang a lungmuanmi hon sawl hi in na um ahia? David in a mite khuate hong hihse ding a entel ding leh enkhe ding a na kiang a honsawl ahi ka hia? a chi ua.
4. Huchi in, Hanun in David mite a man a, a khamul langkhat uh a metsak a, huan, a puansilhte uh a laitak ah a taw uh phazou lel in a tansak a, a paisakta hi.
5. Huan, David a hilh ua, a dawn ding mi a sawl a; amau lah a zum mahmah ngal ua. Huan, kumpipa'n, Na khamul uh a sel sau ma in Jeriko ah om tadih unla, huai nung chiang in hong pai le uchin, a chi a.
6. Huan, Amon suante'n David huatlam a na hihta uh chih a theih un Amon suante'n Beth-rehob a mi Suriate leh Zoba a mi Suriate, sepaih singnih leh, kumpipa Maak a mi sangkhat toh, Tob mite singkhat leh sangnih toh a thukhak a, a guai hi.
7. Huan, David in huai a zak in Joab leh sepaih hangsan tengteng a sawl a.
8. Huan, Amon suante a hong kuan ua, kho lutna kongkhak lam ah panmun a bawl ua; huan, Zoba a mi leh Rehob a mi Suriate leh Tob leh Maakte bel a tuam in pawn ah a om uh.
9. Huchi in a malam uh leh a nunglam uah a hon sual sin uh chih Joab in a theih in Israel mite lak a mi a hoih tata a telkhia a, Suria mite sual ding in panmun a na bawl a:
10. Huan, mi dang tengteng a unaupa Abisai khut ah a koih vek a, Amon suante sual ding in panmun a bawl hi.
11. Suria mite ka zoh sinkei leh, nang non huh ding, huan, Amon suante na zoh sinkei leh ka hong huh ding.
12. Hang tak in om unla, I mite leh I Pathian khua hum in I ki pasalsak ding uh; huan, TOUPA'N hoih a sak bangbang in hih hen, a chi a.
13. Huchi in Joab leh a kiang a mite'n Suria mite sual ding in kidouna mun lam a zuan ua; huan, a ma ah a taikek uh.
14. Huan, Amon suante'n Suria mite a taikek uh chih a theih un amau leng Abisai ma ah a taikek teita uh, khua ah a lut uh. Huan, Joab in Amon suante a kiksan a, Jerusalem ah a paita.
15. Huan, Suria mite'n Israelte ma ah a ginakei uh chih a theih un a kikaikhawm ua.
16. Huan, Hadadezer in mi a sawl a, Lui khenlam a Suria mite a pi khia a, Hadadezer sepaih heutu Sobak in ma a kai; Helam ah a hong pai uh.
17. Huan, huai tuh David a hilh uh; huan, aman Israel mi tengteng a sam khawm a, Jordan lui a kan ua, Helam ah a hoh uh.
18. Huan, Suria mite'n David dou ding in panmun a na bawl ua, a na sual ua. Huan, Suria mite Israelte ma ah a taikek uh; huan, David in Suria mi kangtalai za sagih tung a tuang leh sakol tungtuang mi singli a that a, huan, a sepaih heutu uh Sobak leng a that a, huailai ah a sita hi.Huchi in Hadadezer sikha a om kumpipate tengteng in Israelte ma ah a ginata kei uh chih a theih un, Israelte toh kilemna a bawl ua, a sikha un a omta uh. Huchi in Suria mite'n Amon suante a panpih ngam nawnkei uhi.
19. Huchi in Hadadezer sikha a om kumpipate tengteng in Israelte ma ah a ginata kei uh chih a theih un, Israelte toh kilemna a bawl ua, a sikha un a omta uh. Huchi in Suria mite'n Amon suante a panpih ngam nawnkei uhi.

  2Samuel (10/24)