| ← Psalms (77/150) → |
| 1. | Ilizwi lami likuNkulunkulu, njalo ngiyakhala, ilizwi lami likuNkulunkulu, wasebeka indlebe kimi. |
| 2. | Osukwini lokuhlupheka kwami ngayidinga iNkosi; isandla sami selulwa ebusuku, kasiphezanga, umphefumulo wami wala ukududuzwa. |
| 3. | Ngamkhumbula uNkulunkulu, ngabubula; ngakhalaza, lomoya wami waphela amandla. Selah. |
| 4. | Ubambe amehlo ami ukuthi angalali; ngakhathazeka, kangisakhulumanga. |
| 5. | Ngakhumbula insuku zasendulo, iminyaka yekadeni. |
| 6. | Ngakhumbula ingoma yami, ebusuku, ngakhuluma lenhliziyo yami, lomoya wami wahlolisisa. |
| 7. | INkosi izalahla kokuphela yini? Njalo kayiselakuphinda ibe lomusa yini? |
| 8. | Uthandolomusa lwayo seluphelile kokuphela yini? Isithembiso sesiphelile kusukela kusizukulwana kusiya kusizukulwana na? |
| 9. | UNkulunkulu usekhohliwe ukuba lomusa yini? Usevalele isihawu sakhe ngolaka yini? Selah. |
| 10. | Ngasengisithi: Lobu yibuthakathaka bami: Isandla sokunene soPhezukonke siphendukile. |
| 11. | Ngizakhumbula izenzo ze Nkosi. Isibili, ngizakhumbula izimangaliso zakho ezindala. |
| 12. | Ngizazindla ngomsebenzi wakho wonke, ngikhulume ngezenzo zakho. |
| 13. | Nkulunkulu, indlela yakho isendaweni engcwele. Ngubani unkulunkulu omkhulu njengoNkulunkulu? |
| 14. | Wena unguNkulunkulu owenza isimangaliso; wazisa amandla akho phakathi kwezizwe. |
| 15. | Ngengalo yakho uhlengile abantu bakho, amadodana kaJakobe loJosefa. Selah. |
| 16. | Amanzi akubona, Nkulunkulu, amanzi akubona, ethuka; izinziki lazo zathuthumela. |
| 17. | Amayezi athulula amanzi, lezibhakabhaka zaduma; imitshoko yakho layo yaya le lale. |
| 18. | Ilizwi lokuduma kwakho lalisesibhakabhakeni; imibane yakhanyisa umhlaba; lomhlaba wagedezela wazamazama. |
| 19. | Indlela yakho iselwandle, lomkhondo wakho emanzini amanengi, lezinyathelo zakho zazingaziwa. |
| 20. | Wakhokhela abantu bakho njengomhlambi ngesandla sikaMozisi loAroni. |
| ← Psalms (77/150) → |