| Nahum (1/3) → |
| 1. | Leli yilizwi ngeNineve. Le yincwadi yombono kaNahume weElikoshi. |
| 2. | I Nkosi inguNkulunkulu olobukhwele ophindiselayo; i Nkosi ingumphindiseli, igcwele ulaka; i Nkosi iphindisela ezitheni zayo, igcinela izitha zayo intukuthelo. |
| 3. | I Nkosi iyaphuza ukuthukuthela, kodwa ilamandla amakhulu, kayiyikumyekela ngitsho olecala; indlela yayo isesivunguzaneni lesiphepheni, lamayezi aluthuli lwenyawo zayo. |
| 4. | Ikhuza ulwandle lutshe, yenze imifula yonke itshe; iBashani leKharmeli kubone, lempoko zeLebhanoni zibune. |
| 5. | Intaba ziyanyikinyeka phambi kwayo, lamaqaqa ayancibilika; ilizwe liyachitheka phambi kwayo, umhlaba labo bonke abakhileyo kuwo. |
| 6. | Ngubani ongema phambi kwentukuthelo yayo? Ngubani ongema ekuvutheni kolaka lwayo? Ulaka lwayo luthululeka njengomlilo, lamadwala aqekezeke phambi kwayo. |
| 7. | I Nkosi ilungile, iyinqaba esukwini lokuhlupheka; iyabakhumbula abaphephela kuyo, |
| 8. | lapho izikhukhula zibafikela; kodwa labo abamelana layo izabachitha bathi nya, ixotshele izitha zayo emnyameni. |
| 9. | Lenza amacebo bani nge Nkosi? Izaqeda konke, kayiyikuphindisela kabili ezitheni zayo. |
| 10. | Njengameva abambeneyo bayaqedwa bonke, baphele njengamabibi omileyo. |
| 11. | Kavelanga yini kuwe, Nineve, owenza amacebo amabi nge Nkosi, wanika iseluleko esibi? |
| 12. | I Nkosi ithi: Loba amaAsiriya elamandla, futhi emanengi, azaqedwa anyamalale. Loba ngikuhluphile, Juda, kangisayikukuhlupha futhi. |
| 13. | Sengizakwephula ijogwe elikuwe, ngiqamule izibopho zakho. |
| 14. | I Nkosi ilayile ngawe, Nineve, yathi: Kalisayikukhunjulwa ibizo lakho; endlini yabonkulunkulu bakho ngizachitha izithombe ezibaziweyo lezithombe ezibunjwe ngokuncibilikisa; ngizagebhela ingcwaba, ngoba ungcolile. |
| 15. | Khangelani ezintabeni inyawo zakhe oletha indaba ezinhle, omemezela ukuthula. Gcina imikhosi yakho, Juda, ugcwalise izithembiso zakho, ngoba omubi kasayikumelana lawe futhi, uchithiwe waphela nya. |
| Nahum (1/3) → |