| ← Micah (4/7) → |
| 1. | Kuzakuthi ensukwini ezizayo intaba yendlu ye Nkosi iphakanyiswe phezu kwazo zonke intaba, yengame wonke amaqaqa; abantu bazabekelela baye kuyo, |
| 2. | lezizwe ezinengi zizafika zithi: Wozani sikhwele entabeni ye Nkosi, siye endlini kaNkulunkulu kaJakobe, ukuze asifundise indlela zakhe, ukuze sihambe endleleni zakhe. Ngoba kuzaphuma ukufundisa eZiyoni, lelizwi le Nkosi eJerusalema. |
| 3. | Izakwahlulela phakathi kwezizwe ezinengi, equmele izizwe ezilamandla ezikhatshana; zizakhanda inkemba zazo zibe yimilomo yamakhuba, lemikhonto yazo ibe zingqamu zokuthena izihlahla; izizwe kazisayikuphuma impi, kazisayikufunda impi futhi; |
| 4. | kodwa abantu bazazihlalela ngaphansi kwezihlahla zabo zevini, langaphansi kwezomkhiwa, kabayikwethuswa lutho; ngoba umlomo we Nkosi yamabandla ukhulumile. |
| 5. | Ngoba bonke abantu balalela uNkulunkulu wabo, kodwa thina sizalalela i Nkosi uNkulunkulu wethu kuze kube nininini. |
| 6. | Ngalolosuku, kutsho i Nkosi, ngizababuthanisa abaqhulayo, ngiqoqe abaxotshiweyo lalabo engibahluphileyo. |
| 7. | Abaqhulayo ngizabenza babe lixukwana labaseleyo, labadeliweyo babe yisizwe esilamandla; i Nkosi izababusa entabeni yeZiyoni, kusukela khathesi kuze kube nininini. |
| 8. | Wena, umphotshongo yomhlambi, ntaba yeZiyoni, kuzafika kuwe ukubusa kwakuqala, umbuso weJerusalema. |
| 9. | Usumemezelani kangaka? Kawuselankosi yini? Ubhubhile ummeli wakho yini ukuze wehlelwe ngumhelo njengobelethayo ? |
| 10. | Zitshile, ububule, Ziyoni, njengowesifazana ohelelwayo; ngoba khathesi uzaphuma emzini, uhlale egangeni; uzakuya leBhabhiloni lapho ozakhululwa khona, lapho i Nkosi ezakuhlenga khona ezitheni zakho. |
| 11. | Izizwe ezinengi zibuthene zisithi: Kangcoliswe, lamehlo ethu ajolozele eZiyoni. |
| 12. | Kodwa kabayazi imicabango ye Nkosi, kabawaqedisisi amacebo ayo, ukuthi ubabuthelele njengezithungo ebaleni lokubhulela. |
| 13. | Sukuma, ubhule, Ziyoni, ngoba ngizakwenza impondo zakho zibe yinsimbi, lamasondo akho abe lithusi. Uzahoboza abantu abanengi, wehlukanisele i Nkosi inzuzo yabo lemfuyo yabo iNkosi yomhlaba wonke. |
| ← Micah (4/7) → |