| Lamentations (1/5) → |
| 1. | Yeka ukuhlala kwawo wodwa umuzi owawugcwele abantu! Usunjengomfelokazi wona owawumkhulu phakathi kwezizwe. Wona owawuyinkosikazi phakathi komuzi usuyisibhalwa. |
| 2. | Uyakhala lokukhala inyembezi ebusuku, inyembezi zawo zehla ezihlathini zawo. Phakathi kwazo zonke izithandwa zawo kakho owududuzayo. Bonke abangane bawo bawuphethe ngenkohliso, sebeyizitha zawo. |
| 3. | UJuda wathunjwa waya kwezinye izizwe ngenxa yokuhlupheka lobugqili obukhulu. Usehlezi phakathi kwezizwe, katholi ukuphumula. Bonke abamzingelayo bamficile ephakathi kobuhlungu. |
| 4. | Imigwaqo eya eZiyoni iyalila, ngoba kakho ozayo kuyo emikhosini emisiweyo. Emasangweni ayo kakulabantu, labapristi bayo bayabubula. Intombi zayo ziyahlupheka. Isekubabeni. |
| 5. | Izitha zayo seziyibusa, ziyaphumelela, ngoba i Nkosi yenze yahlupheka ngenxa yobunengi beziphambeko zayo. Abantwana bayo bathunjiwe yizitha. |
| 6. | Bonke ubukhosi buphelile eZiyoni. Izikhulu zayo sezinjengendluzele ezingatholi idlelo, zibalekile zingelamandla phambi kwabazixotshayo. |
| 7. | IJerusalema iyakhumbula ensukwini zokuhlupheka lezosizi lwayo konke okuhle okwakukhona ensukwini zasendulo. Nxa abantu bayo bewela ezandleni zesitha, kwakungekho olisizayo; isitha sathokoza ngayo, sahleka ukuchitheka kwayo. |
| 8. | IJerusalema yonile kakhulu, ngakho isiyisinengiso. Bonke ababeyihlonipha sebeyidelela, ngoba sebebonile ubuze bayo. Yebo, isibubula, ikhangele eceleni. |
| 9. | Ukungcola kwayo kwakusezidwabeni zayo, kayikhumbulanga ngokuchitheka kwayo. Ngakho-ke ukuwa kwayo kukhulu, kayilaye umduduzi. Nkosi, akukhangele ukuhlupheka kwayo, ngoba isitha sesinqobile. |
| 10. | Isitha selula izandla zaso ukuthatha konke okuhle kwayo. Ibonile izizwe zihlasela indlu yayo engcwele, zona owazalela ukungena phakathi kwebandla lakho. |
| 11. | Bonke abantu bayo bayabubula bedinga ukudla; banike okuligugu kwayo ngokudla ukuze baqinise amandla abo. Nkosi, ake ukhangele ngoba mina Jerusalema ngiyadelelwa. |
| 12. | Kakusilutho kini yini lonke elidlulayo? Khangelani libone ukuthi kukhona yini usizi olunjengolwami, olwehliselwe phezu kwami, i Nkosi engehlisele lona esukwini lokuthukuthela kwayo. |
| 13. | Iphezulu ithumele umlilo, yawehlisela emathanjeni ami. Yathiya inyawo zami ngembule, yangibuyisela emuva. Yangitshiya ngithithibele, ngiphele amandla usuku lonke. |
| 14. | Iziphambeko zami zabotshelwa kimi, isandla sayo sazithandela kimi. Ijogwe layo lafakwa entanyeni yami, ngaphela amandla ngenxa yobunzima balo. INkosi yangiyekelela kilo, ngehluleka ukuma. |
| 15. | INkosi yeyisile wonke amaqhawe ami phakathi kwami, yabiza umhlangano omelene lami ukubulala amajaha ami. INkosi inyathele isikhamelo sewayini sentombi emsulwa, indodakazi yakoJuda. |
| 16. | Ngiyakhala inyembezi ngenxa yalezizinto, amehlo ami ajuluka inyembezi; ngoba umduduzi ukhatshana lami obezangimisa isibindi. Abantwana bami bachithekile ngoba isitha sinqobile. |
| 17. | IZiyoni iyelula izandla zayo, kodwa kakho oyiduduzayo. I Nkosi ilayile ngoJakobe ukuthi abakhelene laye babe yizitha zakhe. IJerusalema injengowesifazana owehlukanisiweyo phakathi kwabo. |
| 18. | I Nkosi ilungile, ngoba ngilihlamukile ilizwi layo. Kodwa ake lizwe, bantu lonke, libone ukuhlupheka kwami. Intombi zami lamajaha ami kuthunjiwe. |
| 19. | Ngabiza izithandwa zami, kodwa zangikhohlisa. Abapristi labadala bami baphelela phakathi komuzi, besadinga ukudla ukuze baqinise amandla abo. |
| 20. | Ake ukhangele, Nkosi, ngoba sengihluphekile. Imibilini yami idungekile, inhliziyo yami ikhathazekile phakathi kwami, ngoba ngihlamukile kakhulu. Phandle yinkemba ebulalayo, endlini yikufa. |
| 21. | Ake uzwe ukububula kwami, kakho ongiduduzayo. Zonke izitha zami zizwile ngokuhlupheka kwami, ziyathokoziswa yikuthi nguwe okwenzileyo. Lufikise usuku osulumemezile, uzenze ukuthi zibe njengami. |
| 22. | Kakufike bonke ububi bazo phambi kwakho, wenze kizo njengokwenza kwakho kimi ngenxa yazo zonke iziphambeko zami. Ngoba ukububula kwami kukhulu, lenhliziyo yami ikhathele. |
| Lamentations (1/5) → |