| ← Jeremiah (9/52) → |
| 1. | Kungathi ngabe ikhanda lami lingamanzi, lamehlo ami angumthombo wenyembezi, ukuze ngikhalele ababuleweyo ebantwini bami emini lebusuku. |
| 2. | Kungathi ngabe ngilendawo yokuhlala enkangala, ukuze ngisuke ebantwini bami, ngibatshiye; ngoba bonke bayizifebe, balixuku labantu abakhohlisayo. |
| 3. | Balungele ukuqamba amanga; amanga akhulile kuleqiniso elizweni; basuka kokubi baye kokubi, mina-ke kabangazi, kutsho i Nkosi. |
| 4. | Ngulowo lalowo kaqaphele umakhelwane wakhe, lingabathembi abafowenu, ngoba bonke abafowenu bayaphica, labo bonke omakhelwane benu bathanda ukunyeya. |
| 5. | Ngulowo lalowo ukhohlisa umakhelwane wakhe, kakho okhuluma iqiniso, bazifundisile inlimi zabo ukuqamba amanga, bazidinisa ngokwenza okubi, baze behluleke ukuphenduka. |
| 6. | Bandisa ububi phezu kokubi, lenkohliso phezu kwenkohliso, bayala ukungazi mina, kutsho i Nkosi. |
| 7. | Ngakho-ke, i Nkosi yamabandla ithi: Khangela, ngizabancibilikisa ngibahlole; ngoba kuyini okunye engingakwenza ngenxa yabantu bami? |
| 8. | Ulimi lwabo lungumtshoko obulalayo, lukhuluma inkohliso; ngulowo lalowo ukhuluma kuhle ngomlomo wakhe lomakhelwane wakhe, kodwa enhliziyweni yakhe wenza amacebo okumcathamela. |
| 9. | Kangiyikubajezisa ngenxa yalezizinto yini? kutsho i Nkosi. Kangiyikuphindisela esizweni esinje yini? |
| 10. | Ngizakhala ngililele izintaba, lamadlelo asenkangala, ngoba kuchithiwe, kakusekho ohamba khona, kakusezwakali ukukhala kwezifuyo, inyoni zamazulu lenyamazana zibalekile zahamba. |
| 11. | Ngizayenza iJerusalema ibe lunxiwa oludilikileyo lendawo yamakhanka, ngenze imizi yakoJuda ibe yinkangala engelamuntu. |
| 12. | Ngubani umuntu ohlakaniphileyo ongaqedisisa lokhu? Lomlomo we Nkosi ukhulume lobani ukuthi akubike lokhu? Ilizwe lichithelweni latshiswa laba yinkangala, ukuthi kungahambi muntu khona yini? |
| 13. | I Nkosi yathi: Kungoba belahlile umlayo wami engawubeka phambi kwabo, bengalilalelanga ilizwi lami, bengahambanga ngalo, |
| 14. | belandela inhliziyo zabo ezilenkani bedinga oBhali, njengokufundiswa kwabo ngoyise. |
| 15. | Ngakho-ke i Nkosi yamabandla, uNkulunkulu kaIsrayeli, ithi: Khangela, ngizabanika lababantu umhlonyane ukuthi bawudle, banathe amanzi abulalayo. |
| 16. | Ngizabachithela ezizweni abangazanga bazazi bona laboyise, ngibalandelisele ngenkemba, ngize ngibaqede. |
| 17. | I Nkosi yamabandla ithi: Qaphelani, libize abesifazana bokulila ukuthi beze, libize abesifazana abangamagabazi ukuthi bafike, |
| 18. | baphangise ukusililela, ukuze amehlo ethu ehlise inyembezi, lenkophe zethu zimpompoze amanzi. |
| 19. | Ngoba ilizwi lokukhala liyezwakala liphuma eZiyoni lisithi: Yeka ukuchitheka kwethu! Silenhloni kakhulu, ngoba silitshiyile ilizwe, ngoba babhidlizile izindlu zethu. |
| 20. | Yebo, zwanini ilizwi le Nkosi, lina besifazana, lendlebe zenu zilemukele ilizwi layo; lifundise amadodakazi enu ukukhala, kube ngulowo lalowo afundise umakhelwane wakhe ukulila. |
| 21. | Ngoba ukufa kungenile ngamawindi ethu, kwangena ezigodlweni zamakhosi ethu, ukuquma abantwana basuke ezindleleni, lamajaha emagumeni. |
| 22. | Khuluma uthi: I Nkosi ithi: Izidumbu zabantu zizagcwala njengamalongwe endle, lanjengezithungo ezitshiywe emuva ngumvuni, kungekho ozibuthayo. |
| 23. | I Nkosi ithi: Ohlakaniphileyo angazincomi ngokuhlakanipha kwakhe, leqhawe lingazincomi ngobuqhawe balo, lonothileyo angazincomi ngokunotha kwakhe; |
| 24. | kodwa ozincomayo kazincome ngalokhu, ukuthi uyangiqedisisa, futhi uyazi ukuthi mina ngiyi Nkosi elothando, lokulunga, lobuqotho emhlabeni; ngoba lezizinto ngiyazithanda, kutsho i Nkosi. |
| 25. | Khangela, insuku ziyeza, kutsho i Nkosi, lapho ngizatshaya bonke abasokileyo kodwa bengasokanga enhliziyweni; |
| 26. | ngitsho iGibhithe loJuda loEdoma loAmoni loMowabi, labo bonke abahlala enkangala abagela inwele zabo emaceleni; ngoba zonke lezizizwe kazisokanga, lendlu yonke kaIsrayeli kayisokanga enhliziyweni. |
| ← Jeremiah (9/52) → |