| ← Jeremiah (43/52) → |
| 1. | Kwathi lapho uJeremiya eseqedile ukukhuluma ebantwini wonke lamazwi e Nkosi uNkulunkulu wabo eyayimthume wona kibo, |
| 2. | uAzariya indodana kaHoshaya, loJohanani indodana kaKareya, labo bonke abantu abazikhukhumezayo, bathi kuJeremiya: Uqamba amanga. I Nkosi uNkulunkulu wethu kayikuthumanga ukuze uthi kithi: Lingayi eGibhithe ukuze lihlale khona; |
| 3. | kodwa uBaruki indodana kaNeriya uyakuxabanisa lathi ukuze asinikele kumaKhaladiya ukuze asibulale, kumbe asithumbe asise eBhabhiloni. |
| 4. | Ngakho uJohanani indodana kaKareya, lazo zonke induna zebutho, labo bonke abantu kabalilalelanga ilizwi le Nkosi ukuze bahlale elizweni lakoJuda. |
| 5. | UJohanani indodana kaKareya lazo zonke induna zebutho bathatha bonke abaseleyo bakoJuda ababebuyele ukuhlala elizweni lakoJuda bevela kuzo zonke izizwe ababexotshelwe kuzo, baya labo eGibhithe, |
| 6. | amadoda, labafazi, labantwana, amadodakazi enkosi, bonke abantu uNebuzaradani induna yabalindi ayebatshiye kuGedaliya indodana kaAhikhamu, indodana kaShafani; bathatha loJeremiya umprofethi loBaruki indodana kaNeriya. |
| 7. | Bayafika elizweni leGibhithe, ngoba kabalilalelanga ilizwi le Nkosi; bafikela eTahafanesi. |
| 8. | Laselifika ilizwi le Nkosi kuJeremiya eseTahafanesi, |
| 9. | lathi: Thatha amatshe amakhulu, uwafihle endaweni egandelweyo esangweni lesigodlo sikaFaro eTahafanesi, phambi kwabantu bakoJuda, |
| 10. | uthi kibo: I Nkosi yamabandla, uNkulunkulu kaIsrayeli, ithi: Khangela, ngizabiza uNebukadinezari inkosi yeBhabhiloni inceku yami; uzamisa isihlalo sakhe sobukhosi phezu kwalamatshe engiwabekileyo, amise ithente lakhe phezu kwawo. |
| 11. | Uzafika, atshaye ilizwe leGibhithe, labo abamiselwe umkhuhlane abanikele emkhuhlaneni, abamiselwe ukuthunjwa abanikele ekuthunjweni, labamiselwe inkemba abanikele enkembeni; |
| 12. | aphembe umlilo emathempelini abonkulunkulu beGibhithe, abatshise, abathumbe, alicuthe ilizwe leGibhithe njengomelusi ecutha isigqoko sakhe esigcwele izibungu, asuke khona esenqobile. |
| 13. | Uzakwephula insika zeHeliyopolisi eziyizithombe elizweni leGibhithe, atshise ngomlilo amathempeli abonkulunkulu beGibhithe. |
| ← Jeremiah (43/52) → |