| ← Jeremiah (4/52) → |
| 1. | Uba uphenduka, wena Israyeli, kutsho i Nkosi, phendukela kimi. Uba ususa phambi kwami izinengiso zakho, ungasuki kimi, |
| 2. | futhi uzafunga: Kuphila kukaJehova, ngeqiniso, ngokwahlulela, langokulunga; lezizwe zizabusiswa kuyo, lakuyo zizincome. |
| 3. | Ngoba i Nkosi ithi ebantwini bakoJuda labeJerusalema: Qhathani ingqatho yenu, lingahlanyeli phakathi kwameva. |
| 4. | Zisokeleni e Nkosi ni, ukusoka kwenu kube ngokwenhliziyo, lina bantu bakoJuda labeJerusalema, hlezi ulaka lwami luphembeke njengomlilo, luthungele, kungabi khona ongalucitsha, ngenxa yezenzo zenu ezimbi. |
| 5. | Khulumani koJuda, limemeze eJerusalema lithi: Vuthelani uphondo elizweni, limemeze kakhulu lithi: Buthanani, singene emizini ebiyelweyo. |
| 6. | Misani uphawu olukhomba iZiyoni, libaleke lingemi, ngoba ngiletha okubi okuvela ngenyakatho, lokuchitheka okukhulu. |
| 7. | Isilwane siphumile ehlathini laso, umchithi wezizwe uyeza, uphumile endaweni yakhe ukuze achithe ilizwe lakho; lemizi yakho izakuba ngamanxiwa, kungabi khona umuntu kuyo. |
| 8. | Ngenxa yalokho yembatha amalembu amasaka, ukhale ulile; ngoba ulaka lwe Nkosi olwesabekayo kaluhlehlanga kithi. |
| 9. | Kuzakuthi ngalolosuku, kutsho i Nkosi, amakhosi aphelelwe yisibindi kanye leziphathamandla; abapristi bazamangala, labaprofethi bethuke. |
| 10. | Ngasengisithi: Hawu, Nkosi Jehova! ubakhohlisile isibili lababantu kanye leJerusalema ngokuthi: Lizakuba lokuthula; kanti inkemba ifinyelela emphefumulweni. |
| 11. | Ngalesosikhathi kuzakuthiwa kulabobantu lakuyo iJerusalema: Umoya otshisayo ovela enkangala emadundulwini angelalutho, uyavunguza phezu kwabantu bami, ungeyisiwo wokwela lokuhlungula, |
| 12. | kodwa umoya olamandla, uyeza uthunywe yimi. Mina uqobo ngizabagweba. |
| 13. | Khangela, umufo uyeza njengamayezi, inqola zakhe zinjengesivunguzane, lamabhiza akhe alejubane kulokhozi. Maye babo, ngoba sichithekile! |
| 14. | Wena Jerusalema, hlambulula inhliziyo yakho kuphume ububi, ukuze uphephe. Koze kube nini imicabango yakho emibi ihlala phakathi kwakho? |
| 15. | Ngoba ilizwi liyamemeza lisuka koDani, libika okubi kuvela entabeni yakoEfrayimi. |
| 16. | Xwayisani izizwe ukuthi uyeza, khangela, bikani kuyo iJerusalema lithi: Kufika abavimbezeli bevela elizweni elikhatshana; bayamemeza kuyo imizi yakoJuda. |
| 17. | Njengabalindi bensimu balihanqa inhlangothi zonke, ngoba lingihlamukele, kutsho i Nkosi. |
| 18. | Ukuhamba kwakho lezenzo zakho kukulethele lokho. Lokhu kuyikuphela kwakho, kuyababa, sekufinyelele enhliziyweni yakho uqobo. |
| 19. | Ngilobuhlungu obukhulu, ngiyazitshila ngenxa yobuhlungu. Maye inhliziyo yami! Inhliziyo yami iyatshaya, kangilakuthula; ngoba ngizwile ukukhala kophondo, lomkhosi wempi. |
| 20. | Ukuchitheka kulandela ukuchitheka, ilizwe lonke lichithekile. Amathente ethu adilikile masinyane, lamakhetheni awo ngokucwayiza kwelihlo. |
| 21. | Koze kube nini ngibona isiboniso, ngizwe ukukhala kophondo? |
| 22. | Abantu bami bayizithutha, kabangazi; bangabantwana abayiziphukuphuku, kabalakuqedisisa. Bahlakaniphele ukwenza okubi, kodwa ukwenza okuhle kabakwazi. |
| 23. | Ngabona umhlaba, khangela, wawuze ungelalutho, lamazulu ayengelakukhanya. |
| 24. | Ngabona izintaba, khangela, zazinyikinyeka, lamaqaqa wonke ayenyakazela. |
| 25. | Ngabona, khangela, kakulamuntu, lenyoni zonke zamazulu zasezibalekile. |
| 26. | Ngabona, khangela, ilizwe elivundileyo liyinkangala, lemizi yalo yonke yayidiliziwe phambi kwe Nkosi, laphambi kolaka lwayo oluvuthayo. |
| 27. | Ngoba i Nkosi ithe: Ilizwe lonke lizachitheka, kodwa kangizukuliqeda ngokupheleleyo. |
| 28. | Ngenxa yalokho umhlaba uzalila lamazulu aphezulu abe mnyama; ngoba sengikukhulumile engikuqondileyo; kangiyikuzisola, ngibuyele emuva. |
| 29. | Imizi yonke iyabaleka ngenxa yomsindo wabagadi bamabhiza labaphathi bamadandili; bangena ezixukwini bakhwele emadwaleni, imizi yonke isele ize, kakho ohlala kiyo. |
| 30. | Wena-ke, uzakwenzani? Loba ugqoka okubomvu, ufaka izigqizo zegolide, ugcoba amehlo akho ngomuthi, uzicecisela ize, ngoba izithandwa zakho ziyakudelela, zidinga ukukubulala. |
| 31. | Ngoba ngizwile ilizwi kungathi ngelowesifazana ohelelwayo, ukukhala okubuhlungu okunjengokozibulayo; yikukhala kweZiyoni ekhefuzelayo, iselula izandla zayo isithi: Maye mina! Ngiphelelwa ngamandla ngoba nampa ababulali bayeza. |
| ← Jeremiah (4/52) → |